"५० हजार द्यायचा, तरीही माझ्या मुलाला मारलं"; निळ्या ड्रममध्ये टाकलेल्या सौरभच्या आईचा टाहो

मेरठमधील बहुचर्चित ‘निळा ड्रम’ हत्याप्रकरणातील आरोपी पत्नी मुस्कान रस्तोगी, तिचा प्रियकर साहिल शुक्ला आणि आपल्या सहा महिन्यांच्या मुलीसह न्यायालयात हजर झाली. याच दरम्यान हत्या झालेल्या सौरभ राजपूतची आई रेणू देवी न्यायालयात ढसाढसा रडल्या. त्यांचा आक्रोश कॅमेऱ्यात कैद झाला असून याचा व्हिडीओ सोशल मीडियावर वेगाने व्हायरल होत आहे.

रेणू देवी रडत वारंवार म्हणत होत्या, "माझ्या मुलाला मारून टाकलं... तो दरमहा ५० हजार रुपये द्यायचा. हत्या करणाऱ्यांना फाशी झालीच पाहिजे." मुस्कानच्या कुटुंबातील सदस्यही या प्रकरणात सामील असून पोलीस त्यांच्यावर कारवाई करत नसल्याचा आरोपही त्यांनी केला.

मुस्कानच्या कुशीत सहा महिन्यांची मुलगी

पांढरा टी-शर्ट आणि टोपी घातलेला साहिल आणि चेहऱ्यावर काळा मास्क लावलेली मुस्कान पोलीस गाडीतून खाली उतरले. मुस्कानच्या कुशीत सहा महिन्यांची मुलगी होती. दोघांनाही कडक बंदोबस्तात न्यायालयात हजर करण्यात आलं. न्यायालयात आरोपांच्या आधारे दोघांनाही ३२-३२ प्रश्न विचारण्यात आले. साहिलने आपल्या बाजूने साक्षीदार सादर करण्याची परवानगी मागितली, तर मुस्कानने सर्व आरोप फेटाळून लावले.

आरोपींना फाशी देण्याची मागणी

सौरभची आई रेणू देवी आणि भाऊ राहुल देखील कोर्टात पोहोचले होते. आईने आरोपींना फाशी देण्याची मागणी पुन्हा एकदा केली आणि आपल्या मुलाची निर्घृण हत्या झाल्याचे सांगितले. मुस्कान रस्तोगीने तिचा प्रियकर साहिल शुक्ला याच्यासोबत मिळून पती सौरभ राजपूतची हत्या केली, मृतदेहाचे तुकडे केले आणि ते निळ्या रंगाच्या ड्रममध्ये भरले. पोलिसांनी १९ मार्च २०२५ रोजी दोघांना अटक केली होती.