लव्ह मॅरेज, हुंड्यासाठी छळ..लोखंडी डंबल डोक्यात घातला; दिल्लीतील पोलीस कमांडो काजलला कसं मारलं?

काजल आणि अंकुर यांनी २०२३ साली प्रेम विवाह केला होता. या दोघांना दीड वर्षाचा मुलगा होता.

नवी दिल्ली - दिल्ली पोलिसांच्या विशेष पथकातील २७ वर्षीय SWAT (स्पेशल वेपन्स अँन्ड टेक्टिक्स) कमांडो कजलाने मंगळवारी सकाळी उपचारादरम्यान जीव सोडला आहे. ५ दिवसांपूर्वी पश्चिमी दिल्लीच्या मोहन गार्डनर परिसरात राहणाऱ्या काजलवर तिच्याच पतीने जीममधील लोखंडी डंबलने जीवघेणा हल्ला केला होता. या  हल्ल्यात काजलच्या डोक्यावर गंभीर दुखापत झाली होती. ज्यामुळे ती कोमात गेली. घटनेच्या दिवशी नेमकं काय घडले याबाबत मृत काजलचा भाऊ निखील याने जे सांगितले त्यामुळे कुणाच्याही अंगाचा थरकाप उडेल.

माहितीनुसार, २०२२ च्या बॅचमध्ये भरती झालेली काजल तिच्या हिंमतीने दिल्ली पोलिसांच्या विशेष SWAT पथकाचा भाग बनली होती. २२ जानेवारीला मोहन गार्डन येथील तिच्या राहत्या घरी पती अंकुरसोबत तिचे वाद झाले होते. अंकुर संरक्षण मंत्रालयात क्लर्क पदावर कार्यरत आहे. रागाच्या भरात पती अंकुरने पत्नी काजलच्या डोक्यावर लोखंडी डंबलने हल्ला केला. त्यात ती गंभीर जखमी झाली. या हल्ल्यानंतर अंकुरने काजलला हॉस्पिटलला नेले आणि नातेवाईकांना फोन करून काजलची हत्या केल्याचे सांगितले. या घटनेनंतर आरोपी पती अंकुरला अटक करण्यात आली होती.

फोनवर भावाने ऐकली बहिणीची किंकाळी

काजलचा मोठा भाऊ निखील हा स्वत: दिल्ली पोलीस दलात कॉन्स्टेबल पदावर आहे. त्याने घटनेच्या दिवशी घडलेली कहाणी सांगितली. २२ जानेवारीला अंकुरने मला फोन केला होता. त्यावेळी पती-पत्नी यांच्यात वाद सुरू होता. अंकुरने मला कॉल रेकॉर्ड करण्यास सांगितले. या कॉलमध्ये मला काजल ओरडत असताना ऐकायला आले. त्यानंतर मी फोन कट केला. ५ मिनिटांनी पुन्हा अंकुरचा मला कॉल आला. ज्यात त्याने काजलला जीवे मारल्याचे सांगितले असं निखीलने म्हटलं.

काजल आणि अंकुर यांनी २०२३ साली प्रेम विवाह केला होता. या दोघांना दीड वर्षाचा मुलगा होता. लग्नाच्या काही काळानंतर अंकुरच्या कुटुंबाने हुंड्यासाठी काजलचा छळ सुरू केला. कौटुंबिक वाद वाढल्यानंतर दोघे सोनीपतहून दिल्लीच्या मोहन गार्डनला शिफ्ट झाले होते. २६ जानेवारीला प्रजासत्ताक दिनाची ड्युटी करण्यासाठी काजल दिल्लीला आली होती. त्याचवेळी ही घटना घडली. काजलला खासगी रुग्णालयात उपचारासाठी दाखल केले होते. परंतु प्रकृती बिघडल्यानंतर तिला गाझियाबादच्या यशोदा रुग्णालयात आणले. मात्र उपचारावेळी काजलने जीव सोडला. या घटनेनंतर पोलिसांनी अंकुरविरोधात हत्येचा गुन्हा दाखल केला आहे. सध्या या प्रकरणाचा तपास सुरू आहे.