पित्याने पोटच्या पोराला ज्युसरने ठेचून मारलं; आई-मुलाचं 'अनैतिक नातं' ठरलं हत्येचं कारण?

प्रयागराजमधील करेली येथे एका पित्याने आपल्या १८ वर्षांच्या मुलाची ज्युसरने ठेचून हत्या केली.

उत्तर प्रदेशातील प्रयागराज जिल्ह्यात नात्यातील सर्व मर्यादा ओलांडणारी एक भयंकर घटना घडली आहे. करेली पोलीस ठाण्याच्या हद्दीत एका बापाने आपल्या १८ वर्षांच्या मुलाची ज्युसरने ठेचून हत्या केली. या हत्याकांडामागचे कारण इतके घृणास्पद आहे की, ते ऐकून कोणाचाही थरकाप उडेल. आई आणि मुलामधील कथित अवैध संबंधांच्या संशयावरून पित्याने हे टोकाचे पाऊल उचलल्याचे प्राथमिक तपासात समोर आले आहे.

नेमका प्रकार काय?

आरोपी पिता पप्पू याला आपल्या पत्नीचे आणि मुलाचे अनैतिक संबंध असल्याचा संशय होता. या गोष्टीवरून घरात सतत वाद होत असत. शनिवारी या वादाने रौद्र रूप धारण केले. रागाच्या भरात पप्पूने घरात असलेल्या ज्युसरने आपल्या १८ वर्षांच्या मुलावर सपासप वार केले आणि त्याला अक्षरशः ठेचून मारले. रक्ताच्या थारोळ्यात पडलेल्या मुलाचा जागीच मृत्यू झाला.

हत्या करून पिता फरार

मुलाची हत्या केल्यानंतर आरोपी पिता घटनास्थळावरून पसार झाला आहे. या घटनेची माहिती मिळताच परिसरात एकच खळबळ उडाली. माहिती मिळताच पोलीस तातडीने घटनास्थळी पोहोचले. त्यांनी रक्ताने माखलेला मृतदेह ताब्यात घेऊन उत्तरीय तपासणीसाठी पाठवला आहे. कायदेशीर प्रक्रिया पूर्ण करून पोलिसांनी आरोपी पित्याविरोधात खुनाचा गुन्हा दाखल केला आहे.

पोलीस तपासात धक्कादायक माहिती

एसीपी निकिता श्रीवास्तव यांनी दिलेल्या माहितीनुसार, प्राथमिक चौकशीत आई आणि मुलामधील अवैध संबंधांचा मुद्दा समोर आला आहे. मात्र, खरोखरच असे काही होते की पित्याचा हा निव्वळ संशय होता, याचा सखोल तपास पोलीस करत आहेत. आरोपी पित्याला अटक करण्यासाठी पोलिसांची पथके ठिकठिकाणी छापे टाकत आहेत.