ड्रेनेजच्या सफाईमुळे हत्याकांडाचा उलगडा! ३ महिन्यांपूर्वी बहिणीची हत्या करणारा आरोपी भाऊ अटकेत

९ जानेवारी रोजी झालेल्या तीव्र भांडणानंतर महिला बेपत्ता झाल्याची माहिती मिळाली. पोलिसांनी संशयावरून जोसेफ आणि मारिया तसेच मुलगा काल्टन यांना चौकशीसाठी ताब्यात घेतले

मुंबई - सतत होणाऱ्या वादातून ८० वर्षीय बहिणीची हत्या करून मृतदेह ड्रेनेज लाइनमध्ये फेकणाऱ्या भावाला व त्याच्या पत्नीला अटक करण्यात आली. तीन महिन्यांपूर्वी झालेले हे हत्याकांड ड्रेनज लाइनच्या सफाई कामादरम्यान उघडकीस आल्याचे अंधेरी पोलिसांनी सांगितले. 

२४ एप्रिल रोजी दुपारी साडेतीनच्या सुमारास बृहन्मुंबई पालिकेचे कर्मचारी ड्रेनेज साफसफाईचे काम करताना ओमनगर, मरोळ पाइपलाईन, अंधेरी पूर्व येथील मॅनहोलमध्ये कुजलेल्या अवस्थेत मृतदेह आढळला. या घटनेची माहिती मिळताच अंधेरी पोलिस घटनास्थळी दाखल झाले. मृतदेह कुजल्यामुळे महिलेची ओळख पटविणे आवाहन होते. या प्रकरणाचा तपासासाठी पोलिसांचे पथके नेमण्यात आले. तपासादरम्यान पोलिसांनी परिसरातील हरवलेल्या व्यक्तींची माहिती घेतली. मृतदेहावरील दागिन्यांच्या आधारे महिलेचे नाव ब्लान्स जेम्स सिक्वेरा असल्याचे समजले. 

पाेलिसांत खाेटी तक्रार१० जानेवारीपासून बेपत्ता असल्याप्रकरणी सहार पोलिस ठाण्यात नोंद होती. तपासादरम्यान पोलिसांनी परिसरात चौकशी केली असता मृत महिलेचे तिचा भाऊ जोसेफ कोयलो आणि त्याची पत्नी मारिया कोयलो यांच्याशी वारंवार वाद होत असल्याचे समोर आले.

अंधेरी पाेलिसांनी भावासह पत्नीला ठोकल्या बेड्या९ जानेवारी रोजी झालेल्या तीव्र भांडणानंतर महिला बेपत्ता झाल्याची माहिती मिळाली. पोलिसांनी संशयावरून जोसेफ आणि मारिया तसेच मुलगा काल्टन यांना चौकशीसाठी ताब्यात घेतले. सखोल चौकशीत जोसेफ याने १० जानेवारीच्या मध्यरात्री बहिणीचा खून करून पुरावा नष्ट करण्यासाठी मृतदेह मॅनहोलमध्ये टाकल्याची कबुली दिली. त्यानंतर त्याने पत्नीच्या मदतीने सहार पोलिस ठाण्यात बहीण बेपत्ता झाल्याची खोटी तक्रार दाखल केली होती. याप्रकरणी जोसेफ आणि मारिया यांना पोलिसांनी बेड्या ठोकल्या.