“सॉरी जिया... मम्माला मरावंच लागेल”, महिलेची आत्महत्या; स्मशानभूमीत आला धडकी भरवणारा Video कॉल

ऑनलाईन फसवणूक आणि सतत मिळणाऱ्या धमक्यांमुळे त्रस्त होऊन एका महिलेने आपलं जीवन संपवलं आहे.

उत्तर प्रदेशातील बिजनौर जिल्ह्यातून सायबर गुन्हेगारीबाबत एक धक्कादायक घटना समोर आली आहे. ऑनलाईन फसवणूक आणि सतत मिळणाऱ्या धमक्यांमुळे त्रस्त होऊन एका महिलेने आपलं जीवन संपवलं आहे. ही घटना केवळ आर्थिक फसवणुकीपुरती मर्यादित नसून 'डिजिटल अरेस्ट' सारख्या फंदात पाडून गुन्हेगार लोकांना मानसिकदृष्ट्या कसं उद्ध्वस्त करतात, याचं हे उदाहरण आहे. या घटनेचा खुलासा झाल्यानंतर समोर आलेली 'सुसाईड नोट' मन हेलावून टाकणारी आहे.

कोतवाली शहर परिसरातील फरीदपूर भोगी गावात राहणाऱ्या २८ वर्षीय मोनिकाने २७-२८ एप्रिलच्या रात्री आपल्या खोलीत गळफास लावून आत्महत्या केली. ज्यावेळी तिने हे पाऊल उचललं, तेव्हा तिची ८ वर्षांची मुलगी जिया आणि ११ वर्षांची मुलगी नंदिनी त्याच खोलीत झोपल्या होत्या. सकाळी मुलींना जाग आली तेव्हा आईला त्या अवस्थेत पाहून त्यांनी टाहो फोडला. सुरुवातीला कुटुंबाला हा प्रकार संशयास्पद वाटला, त्यांनी पोलिसांना न कळवताच अंत्यसंस्काराची तयारी केली.

स्मशानभूमीत आला तो 'धडकी भरवणारा' व्हिडीओ कॉल

प्रकरणाला वळण तेव्हा मिळालं, जेव्हा स्मशानभूमीत मोनिकाच्या मृतदेहावर अंत्यसंस्कार सुरू असताना तिच्या मोबाईलवर सतत व्हिडीओ कॉल येऊ लागले. मृत महिलेचा पुतण्या संयोग याने वारंवार येणाऱ्या फोनला कंटाळून शेवटी कॉल उचलला. समोर पोलीस वर्दीत असलेला एक व्यक्ती स्वतःला क्राईम ब्रँचचा अधिकारी सांगत होता. त्याने मोनिकाशी बोलण्याचा आग्रह धरला आणि नकार दिल्यावर कारवाईची धमकी दिली. यामुळे कुटुंबीयांना सायबर फसवणुकीचा मोठा संशय आला.

धमक्या, रेकॉर्डिंग आणि ब्लॅकमेलिंगचा सापळा

घरी परतल्यानंतर जेव्हा खोलीची झडती घेण्यात आली, तेव्हा एका डायरीमध्ये ठेवलेली चिठ्ठी सापडली. यामध्ये मोनिकाने एका अज्ञात तरुणाकडून सतत येणारे फोन, ब्लॅकमेलिंग आणि धमक्यांचा उल्लेख केला होता. मोबाईल तपासला असता व्हॉट्सॲपवर पाच वेगवेगळ्या नंबरवरून आलेले कॉल्स, मेसेज आणि ऑडिओ रेकॉर्डिंग सापडल्या. यातील काही जण अधिकारी बनून तिला घाबरवत होते, तर काही जण गंभीर आरोप करून तिच्यावर प्रचंड मानसिक दबाव टाकत होते.

“पुन्हा जन्म मिळाला तर तुमचीच पत्नी होईल”

सुसाईड नोटमधील प्रत्येक शब्द काळीज चिरणारा होता. मोनिकाने लिहिलं होतं की, "सॉरी, माय डिअर हसबंड, आय लव्ह यू. तुमच्याशी खूप बोलायचं आहे. गेल्या काही दिवसांपासून एक मुलगा मला त्रास देतोय, ब्लॅकमेल करतोय. प्लीज माझ्या मुलांची काळजी घ्या... पुन्हा जन्म मिळाला तर तुमचीच पत्नी म्हणून जन्माला येईल. आपली एनिव्हर्सरी येत आहे, सोबत नसल्याबद्दल सॉरी. माझ्या आई-वडिलांची काळजी घ्या."

“सॉरी जिया... मम्माला मरावंच लागेल”

चिठ्ठीच्या शेवटी तिने आपल्या मुलीचं नाव लिहीत म्हटलं, "सॉरी जिया... मम्माला मरावंच लागेल... त्या मुलाने तुझ्या मम्माला खूप त्रास दिला आहे." या प्रकरणी पती रणधीरच्या तक्रारीवरून पोलिसांनी गुन्हा दाखल केला आहे. पोलीस सुसाईड नोट आणि मोबाईल डेटाच्या आधारे आरोपींचा शोध घेत आहेत. सायबर तज्ज्ञांच्या मते, अशा प्रकारे कोणी धमकावत असल्यास घाबरून न जाता तातडीने सायबर पोलिसांशी संपर्क साधणं अत्यंत आवश्यक आहे.