IPL 2026 MI vs SRH: यंदाच्या हंगामात मुंबई इंडियन्सची (Mumbai Indians) घरच्या मैदानावर म्हणजेच वानखेडे स्टेडियमवर खराब कामगिरी सुरूच आहे. बुधवारी झालेल्या सामन्यात सनरायझर्स हैदराबादने (Sunrisers Hyderabad) मुंबईचा ६ गडी राखून पराभव केला. या पराभवानंतर सोशल मीडियावर संघमालक नीता अंबानी (Nita Ambani) आणि आकाश अंबानी (Akash Ambani) यांचा एक फोटो मोठ्या प्रमाणावर व्हायरल होत आहे, ज्यामध्ये त्यांच्या चेहऱ्यावरील निराशा स्पष्टपणे दिसून येत आहे.
मुंबई इंडियन्सने नाणेफेक जिंकून प्रथम फलंदाजी करण्याचा निर्णय घेतला. सलामीवीर रायन रिकलटनने अवघ्या ५५ चेंडूत १२३ धावांची धडाकेबाज खेळी केली. मुंबई इंडियन्ससाठी हे या स्पर्धेतील सर्वात वेगवान शतक ठरले. त्याच्या या खेळीच्या जोरावर मुंबईने २० षटकांत ५ बाद २४३ धावांचा डोंगर उभा केला. मात्र, हैदराबादच्या फलंदाजांनी हे आव्हान अगदी सहज पेलले. ट्रेव्हिस हेडने ३० चेंडूत ७६ धावांची वादळी खेळी केली, तर हेनरिक क्लासेनने ३० चेंडूत नाबाद ६५ धावा करत संघाला १८.४ षटकांतच विजय मिळवून दिला. क्लासेनला त्याच्या या कामगिरीसाठी 'सामनावीर' (Player of the Match) पुरस्काराने गौरवण्यात आले.
संघमालक हतबल, निराश
व्हायरल झालेल्या फोटोमध्ये नीता अंबानी आणि आकाश अंबानी दोघेही अत्यंत हतबल आणि निराश असल्याचे झाल्याचे दिसत आहेत. आकाश अंबानी तर शून्यात नजर लावून बसलेले दिसत आहेत. मुंबई इंडियन्सचा हा आठ सामन्यातील सहावा पराभव असून, घरच्या मैदानावर आणि प्रेक्षकांसमोर मिळालेल्या या पराभवामुळे मालकांच्या चेहऱ्यावरील हतबलता चाहत्यांच्या मनात घर करून गेली आहे. दुसरीकडे हैदराबादसाठी हा विजय महत्त्वाचा ठरला असून, ते गुणतालिकेत तिसऱ्या स्थानावर पोहोचले आहेत.
