दोन माजी अध्यक्षांनी दिल्या कर्मचाऱ्यांना धमक्या

बीड : जिल्हा मध्यवर्ती सहकारी बँकेचे संचालक मंडळ अद्याप खुर्चीतही टेकले नाही तर शुक्रवारी पहिल्याच दिवशी दोन माजी अध्यक्षांनी बँकेत जाऊन एका वकिलास व कर्मचाऱ्यास पूर्वी केलेल्या कारवाईचा राग मनात धरून धमक्या दिल्याचा प्रकार घडला. हे दोन्ही माजी अध्यक्ष नवनिर्वाचित संचालकांचे वडील आहेत.जिल्हा मध्यवर्ती सहकारी बँकेच्या संचालक मंडळावर असताना राजाभाऊ मुंडे व सुभाष सारडा यांनी बोगस कागदपत्रांच्या आधारे अफरातफर करीत कोट्यवधी रुपयांचे कर्ज उचलले होते. याप्रकरणी त्यांच्यावर गुन्हे दाखल करण्यात आले आहेत. विशेष म्हणजे अपहार प्रकरणी राजाभाऊ मुंडेंनी ‘हर्सूल’वारीही केली आहे.दरम्यान, बँकेच्या संचालक मंडळासाठीची निवडणूक नुकतीच पार पडली आहे. गुन्हे दाखल असलेल्या व्यक्तींना संचालक मंडळाच्या निवडणुकीपासून दूर ठेवण्याचा निर्णय घेण्यात आला होता. त्यामुळे गुन्हे दाखल झालेल्या माजी संचालक मंडळाच्या सदस्यांनी त्यांची मुले व नातेवाईकांना या निवडणुकीच्या रिंगणात उतरविले होते. सदरील निवडणुकीत काही घोटाळेबाज माजी संचालकांचे नातेवाईक व मुले निवडून आली आहेत.पहिल्या दिवशीच उलट परिणामनवनिर्वाचित संचालक फुलचंद मुंडे यांचे वडील राजाभाऊ मुंडे आणि आदित्य सारडा यांचे वडील सुभाष सारडा हे शुक्रवारी दुपारी साडेतीनच्या सुमारास बँकेत दाखल झाले. त्या दोघांनी प्रथम बँकेची बॅलेन्सशीट व इतर कागदपत्रे तपासली. त्यानंतर बँकेचा कारभार पाहणाऱ्या वकिलासोबत हुज्जत घालण्यास त्यांनी सुरूवात केली. तसेच बँकेतील इतर कर्मचाऱ्यांना धमकावले. जवळपास दोन तास ते बँकेत असल्याची माहिती सूत्रांनी दिली.डीसीसी बँकेचे आर्थिक व्यवहार सुरळीत करण्यासाठी व बँक पूर्ववत आणण्यासाठी प्रयत्न करणे हे संचालक मंडळापुढचे मोठे आव्हान आहे. त्यांना सर्व कर्मचाऱ्यांच्या हातात हात घालून काम करण्याची गरज आहे. मात्र, पहिल्याच दिवशी माजी संचालकांनी गोंधळ घातला. हा प्रकार हितवाह नसल्याची प्रतिक्रिया सर्वसामान्यांमधून उमटत आहे. प्रतिक्रियासाठी संपर्क साधला असता, राजाभाऊ मुंडे व सुभाष सारडा यांच्याशी संपर्क होऊ शकला नाही. (प्रतिनिधी)जिल्हा मध्यवर्ती सहकारी बँकेच्या संचालक मंडळाच्या निवडणुकीचा निकाल गुरूवारी जाहीर झाला. निवडणूक निर्णय अधिकाऱ्यांनी उपनिबंधक कार्यालय लातूर यांना नवनिर्वाचित संचालकांची यादी पाठविली आहे. १५ मे रोजी डीसीसी अध्यक्ष पदाची निवड होणार असल्याची माहिती सहायक निवडणूक अधिकारी व्ही. एस. जगदाळे यांनी सांगितले. सर्व सदस्यांना उपस्थित राहण्याच्या नोटिसा पाठविल्या असल्याचे ते म्हणाले. भाजप जिल्हा सरचिटणीस सर्जेराव तांदळे, आडसचे सरपंच ऋषीकेश आडसकर यांची नावे चर्चेत आहेत.