मोबदला वाटपासाठी आणखी १५० कोटी आले

औरंगाबाद : डीएमआयसी प्रकल्पासाठी संपादित बिडकीन येथील जमिनीच्या मोबदलावाटपासाठी उद्योग खात्याने प्रशासनाला आणखी १५० कोटी रुपयांचा निधी दिला आहे

औरंगाबाद : दिल्ली-मुंबई इंडस्ट्रियल कॉरीडॉर (डीएमआयसी) प्रकल्पासाठी संपादित बिडकीन येथील जमिनीच्या मोबदलावाटपासाठी उद्योग खात्याने जिल्हा प्रशासनाला आणखी १५० कोटी रुपयांचा निधी उपलब्ध करून दिला आहे. या निधीचे लवकरच वाटप केले जाणार असल्याचे भूसंपादन अधिकारी तथा पैठण-फुलंब्री उपविभागीय अधिकारी संभाजी अडकुणे यांनी सांगितले. दरम्यान, पंधरा दिवसांपूर्वी आलेल्या शंभर कोटी रुपयांच्या निधीचे वाटप पूर्ण झाले असून यातून सुमारे सव्वाशे शेतकर्‍यांना त्यांच्या जमिनीचा मोबदला मिळाला आहे. डीएमआयसीअंतर्गत बिडकीन, निलजगाव, बन्नी तांडा, बंगला तांडा आणि नांदलगाव येथील २३५१ हेक्टर जमीन संपादित केली जात आहे. जानेवारी महिन्यातच शेतकर्‍यांकडून संमतीपत्रेभरून घेण्यात आली. त्यानंतर लगेचच प्रशासनाने १३१४ कोटी रुपयांच्या मोबदल्याचा प्रस्ताव राज्य सरकारकडे पाठविला. राज्य सरकारने त्याला मंजुरीही दिली; मात्र लोकसभा निवडणुकीमुळे काही दिवस ही प्रक्रिया रखडली; परंतु आता पंधरा दिवसांपूर्वीच उद्योग विभागाने १३१४ कोटींपैकी पहिल्या टप्प्यात शंभर कोटी रुपये दिले. त्याचे आठवडाभरापूर्वीच आधी ७५ आणि नंतर २५ कोटी या प्रमाणे शेतकर्‍यांना वाटप करण्यात आले. आता गुरुवारी उद्योग खात्याने आणखी १५० कोटी रुपयांचा निधी उपलब्ध करून दिला आहे. उपविभागीय अधिकारी संभाजी अडकुणे यांनी सांगितले की, आतापर्यंत शंभर कोटी रुपयांचे वाटप पूर्ण झाले आहे. आज आणखी दीडशे कोटी रुपये प्राप्त झाले आहेत. भूसंपादनाचे चित्र गाव हेक्टर शेतकरी बिडकीन१४७८१७८३ निलजगाव५९५६ बंगला तांडा२९०३७७ बन्नी तांडा१८३३९६ नांदलगाव३४०२९९ एकूण२३५१२९११