सेनेचा तिळपापड

 औरंगाबाद : महापालिकेतील सत्ताधार्‍यांमध्ये पाणीपुरवठ्यावरून राजकारण पेटले आहे. भाजपाचे उपमहापौर संजय जोशी यांनी किमान पाणीपुरवठ्यात येणार्‍या अडचणींचा काल ७ मे रोजी शोध घेण्याचा प्रयत्न केला. त्यामुळे शिवसेनेचा जळफळाट झाल्याने खा.चंद्रकांत खैरे यांच्या उपस्थितीत आज सायंकाळी सुभेदारीवर तातडीने पाणीपुरवठा विभागाची बैठक घेण्यात आली. बैठकीला महापौर कला ओझा यांच्यासह कार्यकारी अभियंता हेमंत कोल्हे यांची उपस्थिती होती. लोकसभा निवडणूक काळातही अडचणी होत्याच; मात्र नगरसेवक प्रचारात गुंतलेले असल्याने पालिका प्रशासनापर्यंत नागरिकांची ओरड पोहोचली नाही. २४ एप्रिलनंतर पाणीपुरवठ्याच्या वेळापत्रकाबाबत ओरड सुरू झाली. महापौर कला ओझा यांच्यासह एकाही पदाधिकार्‍याने पाणीपुरवठ्याप्रकरणी तोंड उघडले नाही. पंधरा दिवसांपासून वर्तमानपत्रात सिडको-हडकोतील पाणीपुरवठ्याप्रकरणी वृत्त येत आहे. ते वृत्त वाचून पालिका सत्ताधारी, विरोधी पक्षाने अथवा प्रशासनाने आढावा घेणे क्रमप्राप्त होते. मात्र, दोन अभियंत्यांच्या जिवावर सगळा विभाग सोडून सर्वांनी दुर्लक्ष केले. परिणामी मुबलक पाणी असतानाही दुष्काळासारखा अनुभव नागरिकांना आला. निवडणुकीच्या कामावर असलेले कर्मचारी अजून परतलेले नाहीत. आयुक्तांनी घेतली बैठक आयुक्त डॉ.हर्षदीप कांबळे यांनी काल ७ मे रोजी पाणीपुरवठ्याच्या वेळापत्रकाबाबत दोन बैठका घेतल्या. आयुक्त म्हणाले, सिडको- हडकोचा पाणीपुरवठा सुरळीत होत आला आहे. वॉर्डनिहाय वेळापत्रकाचा आढावा घेतला. ज्या त्रुटी होत्या, त्या पूर्णपणे दूर करण्यात आल्या आहेत. ३.५ एमएलडी पाणी वाढणार सिडको-हडकोला सध्या २६ एमएलडी पाणीपुरवठा होतो आहे. त्यामध्ये आणखी साडेतीन एमएलडी पाणीपुरवठा वाढविण्यासाठी प्रशासनाने फ ारोळा येथील जलशुद्धीकरण केंद्राला आज भेट दिली. कार्यकारी अभियंता हेमंत कोल्हे, उपअभियंता यू. जी. शिरसाठ, उपअभियंता के. एम. फालक यांच्यासह इतर अधिकारी होते. फारोळ्याला पाहणी करू न वॉटर रिसायकलिंग करण्यात येईल. मागील आठ दिवसांत रसायनांची मात्रा वाढविण्यात आल्यामुळे पाणी पुन्हा वापरात आले नाही. आता पाणी बर्‍या प्रमाणात उपलब्ध आहे. त्यामुळे साडेतीन एमएलडी पाणी वाढविण्याचा प्रयत्न आहे, असे अभियंता कोल्हे यांनी सांगितले.