'भाजप नगरसेवकांच्या मालमत्ताही अनधिकृत'; पुराव्यासह इम्तियाज जलील मनपा आयुक्तांच्या भेटीला

इम्तियाज जलील यांनी पुराव्यांचा पाढाच वाचला; आयुक्तांची 'कोणालाही सोडणार नाही' अशी ग्वाही

छत्रपती संभाजीनगर : शहरात भाजप नगरसेवकांच्याही अनधिकृत मालमत्ता आहेत. त्यांच्याही तक्रारी मार्च महिन्यातच महापालिकेकडे करण्यात आल्या आहेत. त्यांच्यावर आजपर्यंत कारवाई का करण्यात आली नाही? त्यांच्या अनधिकृत बांधकामांचे पुरावे सादर करण्यासाठी बुधवारी दुपारी एमआयएम पक्षाचे प्रदेशाध्यक्ष इम्तियाज जलील मनपात दाखल झाले. त्यांनी सर्व पुरावे, तक्रारी आयुक्त अमोल येडगे यांना सादर केल्या. या तक्रारींची अतिक्रमण, नगररचना विभागाकडून शहानिशा केली जाईल, दोषी आढळून आल्यास निश्चित कारवाई केली जाईल, कोणालाही सोडणार नाही, अशी ग्वाही आयुक्तांनी दिली.

नारेगाव येथे एमआयएम नगरसेवक मतीन पटेल याच्या तीन मालमत्ता जमीनदोस्त केल्यानंतर दुपारी प्रदेशाध्यक्ष इम्तियाज जलील महापालिका मुख्यालयात दाखल झाले. सोबत पक्षाचे नगरसेवक, पदाधिकारी उपस्थित होते. यावेळी जलील यांनी आयुक्त अमोल येडगे यांची भेट घेतली. या भेटीनंतर माध्यमांशी बोलताना ते म्हणाले की, सत्ताधारी पक्षाच्या काही नगरसेवकांच्या मालमत्ताही अनधिकृत आहेत. यासंदर्भात मनपा अधिकाऱ्यांनी दिलेले कागदपत्रे, अहवाल आणि पुरावे त्यांनी सादर केले. या प्रकरणी आयुक्त येडगे यांनी सर्वांवर कारवाई करणार, असे आश्वासन दिले आहे. त्यांनी कारवाई न केल्यास आम्ही न्यायालयात दाद मागू.

जलील यांच्या भेटीनंतर माध्यमांशी बोलताना येडगे यांनी सांगितले की, मतीन पटेलच्या तीन अनधिकृत मालमत्ता नियमानुसार निष्कासित करण्यात आल्या आहेत. जलील यांनी कागदपत्रे सादर केली आहेत. त्या कागदपत्रांची शहानिशा नगररचना विभागामार्फत करून तक्रारीत तथ्य आढळल्यास कारवाई होईल.