केंद्रातील नरेंद्र मोदी सरकारने सोन्याच्या आयातीवर नियंत्रण मिळवण्यासाठी आणखी एक मोठे पाऊल उचलले आहे. सरकारने ड्युटी-फ्री (करमुक्त) सोन्याच्या आयातीचे नियम आता अधिक कडक केले आहेत. यानुसार आता प्रति परवाना केवळ १०० किलो सोन्याचीच आयात मर्यादा निश्चित करण्यात आली आहे. हे नवीन नियम तातडीने लागू करण्यात आले आहेत.
महत्वाचे म्हणजे, सरकारने सोन्यावरील आयात शुल्क ६ टक्क्यांवरून थेट १५ टक्के केल्यानंतर अवघ्या एका दिवसातच हा नवा निर्णय घेतला आहे. देशाचे विक्रमी आयात बिल कमी करण्याच्या उद्देशाने हा निर्णय घेण्यात आला आहे.
पंतप्रधान नरेंद्र मोदीनी यांनी केलंय सोनं खरेदी टाळण्याचं आवाहन -
पश्चिम आशियातील वाढत्या तणावाचा फटका संपूर्ण जगालाच बसत आहे. याच पार्श्वभूमीवर पंतप्रधान नरेंद्र मोदी यांनी नागरिकांना काटकसर करण्याचे आवाहन केले आहे. पंतप्रधान मोदी यांनी म्हटले आहे की, "सरकार पश्चिम आशियाई संकटाच्या प्रतिकूल परिणामांपासून लोकांचे संरक्षण करण्याचा प्रयत्न करत आहे. अशा स्थितीत काही आवश्यक पावलेही उचलणे आवश्यक आहे. सध्याच्या संकटकाळात परकीय चलन वाचवण्यावर अधिक भर देणे आवश्यक आहे. त्यांनी देशवासीयांना परकीय चलन साठा जपण्यासाठी सहकार्य करण्याचे आवाहन केले आहे.
आपली देशभक्ती आपल्याला परकीय चलन वाचवण्याचे आव्हान देत आहे -
पंतप्रधान मोदींनी म्हटले आहे की, सोन्याच्या खरेदीसाठी देशाचे मोठे परकीय चलन खर्च होते. देशावर संकट किंवा युद्ध आल्यास लोक सोने दान करत. आज दान करण्याची आवश्यकता नाही. मात्र, देशहितासाठी आपण सर्वांनी मिळून एक संकल्प करणे गरजेचे आहे. कोणताही कौटुंबिक सोहळ्यात अथवा कार्यक्रमात सोन्याचे दागिने खरेदी करणे टाळण्याचा संकल्प नागरिकांनी करावा. आपली देशभक्ती आपल्याला परकीय चलन वाचवण्याचे आव्हान देत आहे. हे आव्हान स्वीकारून देशाचे चलन वाचवणे आवश्यक आहे. असेही पंतप्रधान मोदी यांनी म्हटले आहे.
एक वर्ष लग्नासाठी सोने खरेदी करू नका -
किमान एक वर्ष लग्नासाठी सोने खरेदी करू नका. सोन्याच्या आयातीमुळे आपला मोठा पैसा परदेशात जातो. तो पैसा वाचवून बँकांमध्ये जमा करा, जेणेकरून त्याचा उपयोग देशाच्या विकासासाठी व गरिबांच्या कल्याणासाठी होईल, असे आवाहनही नरेंद्र मोदी यांनी केले आहे.