मागेल त्याला मिळेल प्रवेश

 औरंगाबाद : वय ६ ते १४ वर्षे वयोगटातील कोणताही बालक शाळेपासून वंचित राहणार नाही. जिल्ह्यात मागेल त्याला प्रवेश दिला जाईल. त्यासाठी शाळांमधून जागाही भरपूर असल्याची माहिती प्रभारी शिक्षणाधिकारी एम. के. देशमुख यांनी दिली. बालकांचा मोफत व सक्तीच्या शिक्षणाचा हक्क अधिनियमाची अंमलबजावणी सुरू झाली असून, या कायद्यानुसार इयत्ता पहिली ते आठवीपर्यंत कोणत्याही विद्यार्थ्याला शाळांना प्रवेश नाकारता येणार नाही. शैक्षणिक वर्षात केव्हाही विद्यार्थ्यांना प्रवेश देणे बंधनकारक आहे. दि.१६ जून २०१४ रोजी शाळा सुरू होणार असून, नव्या शैक्षणिक सत्रास प्रारंभ होईल. शाळा सुरू झाल्यानंतर शाळांनी प्रवेश सुरू करावा. पालकांनी काही निवडक शाळांचा आग्रह धरू नये, असे सांगून देशमुख म्हणाले, जिल्ह्यात ३,८९३ शाळा असूनही पालकांची ओढ फक्त निवडक ३० ते ३५ शाळांकडे असते, त्यामुळे प्रवेशाच्या अडचणी निर्माण होतात. तरीही प्रवेशासंदर्भात अडचणी निर्माण झाल्यास जिल्हा परिषदेच्या शिक्षण विभागाशी संपर्क साधण्याचे आवाहन त्यांनी केले आहे. पाचवीचे ७७७, आठवीचे ३२६ वर्ग शिक्षण हक्क कायद्यानुसार पहिली ते पाचवी आणि सहावी ते आठवी वर्ग जोडण्यात येत असून, त्यासाठी जिल्हा परिषदेच्या शाळांना पाचवीचे ७७७ आणि आठवीचे ३२६ वर्ग सुरू करण्याची परवानगी शिक्षण आयुक्तांनी औरंगाबाद जिल्हा परिषदेला दिली आहे. आरटीईनुसार पहिली ते पाचवी इयत्तेतील विद्यार्थ्यांना एक किलोमीटरच्या आत आणि सहावी ते आठव्या इयत्तेतील मुलांना तीन किलोमीटर परिघाच्या आत शाळा उपलब्ध करून देणे बंधनकारक करण्यात आले आहे. शाळा संख्या व व्यवस्थापन शासकीय व स्वायत्त संस्था 2,238 खासगी अनुदानित 747 विनाअनुदानित 908 मराठी, हिंदी, उर्दू, इंग्रजी माध्यमांच्या विद्यार्थ्यांची संख्या गतवर्षीची विद्यार्थी संख्या - ८ लाख ४९ हजार १५६ (इयत्ता पहिली ते बारावी) मराठी माध्यमातील विद्यार्थी संख्या- ६ लाख ६६ हजार ५६१ इंग्रजी माध्यमातील विद्यार्थी संख्या -९१ हजार ४७९ उर्दू माध्यमातील विद्यार्थी संख्या -८७ हजार १५२ हिंदी माध्यमातील विद्यार्थी संख्या -३ हजार ९६४ जिल्ह्यातील सर्व शिक्षकांची संख्या -२६ हजार ४५६