लिपिक महिलेकडून एक लाख रुपयांची खंडणी घेताना दोघांना अटक, गुन्हे शाखेची कारवाई

लिपिक महिलेला नोकरी घालविण्याची धमकी देऊन तिच्याकडून एक लाख रुपये खंडणी उकळणा-या दोघांना गुन्हे शाखेच्या पोलिसांनी सापळा रचून गुरूवारी दुपारी साडेतीन वाजेच्याा सुमारास रंगेहात पकडले. ही कारवाई आरटीओ कार्यालयातील सहायक आरटीओ नखाते यांच्या कक्षात करण्यात आली.

औरंगाबाद: लिपिक महिलेला नोकरी घालविण्याची धमकी देऊन तिच्याकडून एक लाख रुपये खंडणी उकळणा-या दोघांना गुन्हे शाखेच्या पोलिसांनी सापळा रचून गुरूवारी दुपारी साडेतीन वाजेच्याा सुमारास रंगेहात पकडले. ही कारवाई आरटीओ कार्यालयातील सहायक आरटीओ नखाते यांच्या कक्षात करण्यात आली.
विनोद फुलचंद गंगवाल (५७,रा. मारवाडी गल्ली, वाळूज)आणि अरूण दगडू माडूकर(५४,रा. जालाननगर)अशी अटक करण्यात आलेल्या आरोपींची नावे आहेत. गुन्हेशाखेचे निरीक्षक शिवाजी कांबळे यांनी सांगितले की, तक्रारदार महिलेचे वडिल २० वर्षापूर्वी अपघातात मरण पावले. यानंतर ती आरटीओ कार्यालयात लिपिकपदी नोकरीला लागली. आरोपी विनोद  हा आरटीओ कार्यालयात एजंट म्हणून काम करतो तर अरूण हा माहिती अधिकार कार्यकर्ता आहे. शिवाय त्याचे स्टेशनरीचे दुकान आहे. त्यांनी तीन महिन्यापूर्वी तक्रारदार महिलेची भेट घेतली आणि आम्ही तुमच्यासंबंधी अनेक महत्वाची कागदपत्रे आमच्या हाती लागली आहे. त्या कागदपत्राच्या आधारे वरिष्ठांकडे तक्रार केल्यास तुझी नोकरी जाऊ शकते, अशी थेट धमकीच त्यांनी दिली.  तुला नोकरी टिकवायची असेल तर आम्हाला दोन लाख रुपये खंडणी द्यावी लागेल, असे ते म्हणाले.  सुरुवातीला काही दिवस त्यांच्या म्हणण्याकडे तक्रारदार यांनी दुर्लक्ष केले. मात्र गेल्या काही दिवसापासून पैसे देता अथवा तुमची तक्रार करू,अशा प्रकारे ते तक्रारदार यांना  ब्लॅकमेल करीत होते. एवढी रक्कम एकदाच देणे शक्य नसेल तर दोन टप्प्यात द्या, असे त्यांनी सांगितले. आरोपींच्या धमकीमुळे प्रचंड घाबरलेल्या तक्रारदार यांनी शेवटी गुन्हेशाखेकडे धाव घेतली.  पोलीस आयुक्त यशस्वी यादव, उपायुक्त डॉ.दिपाली धाटे-घाडगे , सहायक आयुक्त रामेश्वर थोरात,निरीक्षक शिवाजी कांबळे यांच्या मार्गदर्शनाखाली पोलीस  सहायक निरीक्षक घनश्याम सोनवणे, सहायक उप निरीक्षक नंदकुमार भंडारे, पोहेकॉ संतोष सोनवणे, फारूख देशमुख, विजयानंद गवळी, बनकर, पंडित, योगेश गुप्ता, सिद्धार्थ थोरात, नितीन धुळे, लालखा पठाण, धर्मराज गायकवाड, नंदलाल चव्हाण, नवाब शेख, वीरेश बने, रेखा चांदे यांनी गुरूवारी दुपारी आरटीओ कार्यालय परिसरात सापळा रचला.  यावेळी आरोपी विनोद आणि अरूण यांनी तक्रारदार महिलेच्या कार्यालयात जाऊन लिपिक महिलेकडून  खंडणीचा पहिला हप्ता म्हणून एक लाख रुपये घेतले. यानंतर खंडणीच्या रक्कमेसह  गुन्हेशाखेच्या पोलिसांनी दोन्ही आरोपींना रंगेहात पकडले. त्यांच्याविरोधात वेदांतनगर पोलीस ठाण्यात गुन्हा नोंदविण्याची प्रक्रिया रात्री उशिरापर्यंत सुरू होती.