मूल : मूल-नागपुर महामार्गावरील चामोर्शी नाक्यावर किरकोळ स्वरुपात बायो डिझेल विक्री करीत असल्याची माहिती मिळताच तालुका प्रशासनाने त्या ठिकाणी जावून डिझेल विक्री करीत असताना वाहन पकडले. अधिक चौकशी केली त्यांच्याकडे डिझेल विक्री करण्याचे कुठलेली कागदपत्रे नसल्याने मोबाईल वाहन जप्त करण्यात आले आहे.
शासनाने वनस्पतीपासून बायोडिझेल बनविण्याचा उपक्रम हाती घेतला होता. कमी किमतीत बायोडिझेल उपलब्ध होणार, असे सांगितले गेले होते. त्याचाच फायदा घेऊन बायो डिझेल विक्री करण्याचा प्रयत्न करण्यात आला असल्याचा प्रकार मूल-नागपुर महामार्गावरील मूल जवळील चामोर्शी नाक्यावर दिसून आला. याबाबत माहिती होताच तहसिलदार डॉ.रवींद्र होळी यांच्या नेतृत्वाखाली नायब तहसीलदार यशवंत पवार यांनी त्या ठिकाणी भेट दिली. त्यावेळी नेसुस कंपनीचे बायो डिझेल असलेले वाहन (क्रमांक एम.एच.३१ एफ.सी.-५००९) उभे होते. या विक्री बाबत वाहनचालक अतुल कोकावार रा.मूल याला कागदपत्राची मागणी केली असता कुठलेही कागद पत्रे आढळले नाही. त्यामुळे सदर बायो डीझेल वाहन तहसील कार्यालयात जमा करण्यात आले आहे. सबंधिताने कागदपत्रासाठी मुदत मागितली आहे. कागदपत्राची पाहणी केल्यानंतर पुढील कार्यवाही केली जाईल असे नायब तहसीलदार यशवंत पवार यांनी सांगितले.