नेत्रदानात महिलांचा टक्का वाढला!

दिन विशेष ; १५0 महिलांचा नेत्रदानाचा संकल्प.

अनुराधा जाधव / बुलडाणा : 'डोळे हे मनाचा आरसा' असे म्हटले जाते. या उक्तीप्रमाणे डोळे आपल्या शरीराचा अतिशय महत्त्वपूर्ण भाग असून, डोळे नसतील तर आयुष्यच बेरंग होऊन जाते. नेत्रदानाचे महत्त्व जाणून जिल्ह्यातील १५0 जागृत महिलांनी आपल्यानंतर हे सुंदर जग दुसर्‍या कुणाला स्वत:च्या डोळय़ाने पाहता यावे याकरिता नेत्रदान करण्याचा संकल्प करून सामाजिक दायित्व जोपासले आहे. नेत्रदानासाठी संपूर्ण भारतात मोहीम राबविली जात असताना अनेक सामाजिक संस्थासुद्धा शिबिरांच्या माध्यमातून याविषयी प्रबोधन करताना आढळून येतात. जिल्हा सामान्य रुग्णालयात गत वर्षभरात जवळपास ६५0 स्त्री व पुरुषांनी मरणोत्तर नेत्रदान करण्याचा संकल्प केला. यामध्ये १५0 स्त्रिया आणि ५00 पुरुषांनी आपली नावे नोंदविली. इतर अवयव दान करण्याबरोबरच नेत्रदानामुळे आपले डोळे आपल्या मृत्यूनंतर गरजू व्यक्तीच्या कामी येईल. या भावनेतून नेत्रदानाचा संकल्प केल्यानंतर जिल्ह्यातील लोकांमध्ये जनजागृती होताना दिसत आहे. मरणोत्तर नेत्रदान करण्यासाठी १८ ते ४0 वयोगटातील कोणतीही व्यक्ती संकल्पपत्र भरून आपली इच्छा पूर्ण करू शकतो. अशी व्यक्ती अपघातात किंवा नैसर्गिकरीत्या मरण पावली असता त्या व्यक्तीचे डोळे सहा तासाच्या आत काढल्यास त्याचा उपयोग दृष्टिहीन व्यक्तीला होतो. डोळ्याचे रोपन करण्याआधी त्याच्या आजाराची योग्य ती तपासणी करण्यात येऊन डोळय़ाची अवस्था निरोगी आढळून आली तरच ते रोपन केल्या जाते. शहरी भागाप्रमाणे ग्रामीण भागातही या माहिमेची जागृती होणे आवश्यक असून, सामाजिक संस्थेबरोबरच आरोग्य विभागानेही याकडे विशेष लक्ष देण्याची गरज आहे. ग्रामीण भागात नेत्रदात्याचे प्रमाण कमी असण्याचे कारण म्हणजे त्यांच्यामध्ये असलेली अंधश्रद्धा व नेत्रदानाविषयी असलेले अज्ञान, पुनर्जन्मावर असलेला ठाम विश्‍वास यामुळे ते लोक नेत्रदान करण्यास धजावत नाहीत. नेत्रदान सर्वश्रेष्ठ दान कसे आहे, याविषयी नागरिकांमध्ये जनजागृती करण्याची आवश्यकता आहे.