राज्यातील आदिवासी उपाययोजना क्षेत्रातील प्राथमिक, माध्यमिक व उच्च माध्यमिक शाळेत कार्यरत असलेल्या शिक्षक, शिक्षकेतर कर्मचारी यांचे नियमित वेतन तीन ते चार महिने उशिरा होत असल्यामुळे शिक्षकांना अनेक आर्थिक अडचणींचा सामना करावा लागत आहे. याशिवाय वेतन उशिरा होत असल्यामुळे बँकांचे कर्जाचे हप्ते अनियमित झाले असून, मुद्दल रकमेपेक्षा व्याजाची रक्कम वाढली आहे. तसेच सध्या कोरोना महामारीचे संकट असल्यामुळे अनेक शिक्षक कोरोना योद्धा म्हणून कर्तव्य बजावत असून, अनेकांना कोरोनाची लागण झाली आहे. अशावेळी शिक्षकांना तीन ते चार महिने पगार मिळत नसल्याने आदिवासी क्षेत्रातील शिक्षकांचे कुटुंबीय हलाखीचे जीवन जगत आहेत. त्यामुळे एक तारखेचे नियमित वेतन तसेच
इतर मागण्यांकडे शासनाचे लक्ष वेधण्यासाठी संपूर्ण विदर्भात विदर्भ माध्यमिक शिक्षक संघाने शुक्रवारी आपल्याच घरी कुटुंबासह एकदिवसीय अन्नत्याग आंदोलन करण्याचे आव्हान केले होते. त्यानुसार भंडारा जिल्ह्यातील सर्व आदिवासी क्षेत्रातील शिक्षक, शिक्षकेतर कर्मचारी यांनी मोठया संख्येने सहभाग घेतला.
जिल्ह्याचे माध्यमिक शिक्षणाधिकारी संजय डोर्लीकर यांच्यामार्फत वेतनाची समस्या मार्गी लावण्याकरिता शासनाला निवेदन देण्यात आले. निवेदन देतेवेळी विदर्भ माध्यमिक शिक्षक संघाचे जिल्हाध्यक्ष सुधाकर देशमुख, जिल्हा कार्यवाह राजेश धुर्वे, चंद्रशेखर रहांगडाले, टेकचंद मारबाते, धीरज बांते, मनोज अंबादे, जागेश्वर मेश्राम, भाऊराव वंजारी, शालिकराम खोब्रागडे आदी उपस्थित होते.