महाडीबीटी पोर्टलवर कागदपत्रे अपलोड करा

बीड : प्रधानमंत्री कृषी सूक्ष्म सिंचन योजना प्रतिथेंब अधिक पीकअंतर्गत महाडीबीटी पोर्टलवर बीड जिल्ह्यातील १३४०७ लाभार्थ्यांची लॉटरीद्वारे निवड झालेली आहे. त्यांपैकी ४८१८ लाभार्थ्यांनी कागदपत्रे अपलोड केलेले आहेत. उर्वरित ६४३८ लाभार्थी शेतकऱ्यांनी कागदपत्रे अपलोड केलेली नाहीत. कागदपत्रे अपलोड करण्यासाठी जूनअखेर मुदत दिली आहे. विहित कालावधीत कागदपत्रे अपलोड न केल्यास असे अर्ज महाडीबीटी पोर्टलमधून रद्द करण्याबाबत सूचना देण्यात आलेल्या आहेत. ज्या लाभार्थ्यांची लॉटरीद्वारे निवड झालेली आहे; परंतु त्यांनी महाडीबीटी पोर्टलवर कागदपत्रे अपलोड केलेली नाहीत, अशा सर्व शेतकऱ्यांनी जून २१ अखेर तत्काळ कागदपत्रे अपलोड करण्यात यावीत अन्यथा कागदपत्रे अपलोड न केलेल्या लाभार्थ्यांची निवड रद्द करण्यात येईल, असे आवाहन जिल्हा अधीक्षक कृषी अधिकारी दत्तात्रय मुळे यांनी सर्व शेतकऱ्यांना केले आहे.