अंबाजोगाई : तालुक्यातील डोंगरपिंपळा येथे ३५ वर्षीय तरुणाचा डोक्यात दगड घालून खून केल्याची घटना उघडकीस आली आहे. ऐन सणासुदीच्या दिवसांमध्ये ही घटना घडल्यामुळे सर्वत्र खळबळ उडाली आहे.
सचिन शिवाजी तिडके (वय ३५, रा. भोगलवाडी, हल्ली मुक्काम डोंगरपिंपळा, ता. अंबाजोगाई) येथील रहिवासी व डोंगरपिंपळा गावचे जावई आहेत. मागील एक वर्षापासून ते सासुरवाडी डोंगरपिंपळा येथे पत्नी व मुलांसोबत राहत होते. मंगळवारी रात्रीपासून सचिन तिडके हे बेपत्ता होते. बुधवारी दुपारी एक वाजता त्यांचा मृतदेह डोंगरपिंपळा शिवारात चेहऱ्यावर दगड मारून चेंदामेंदा केलेल्या अवस्थेत आढळून आला. घटनास्थळी दारूच्या बाटल्या आढळून आल्या आहेत. घटनेची माहिती मिळताच अंबाजोगाई ग्रामीण पोलिस स्टेशनचे पोलिस उपनिरीक्षक घुगे व पोलिस कॉन्स्टेबल भागवत यांनी घटनास्थळी धाव घेत सचिन यांचा मृतदेह स्वामी रामानंद तीर्थ रुग्णालय येथे शवविच्छेदनासाठी पाठवण्यात आला आहे.
याबाबत गुन्हा दाखल करण्याची प्रक्रिया उशिरापर्यंत सुरू होती. दरम्यान, सदरील खून हा सासुरवाडीतील लोकांनीच घडवून आणला असल्याचे सचिन यांच्या नातेवाइकांचे म्हणणे आहे. कारण, ते मृतदेहाजवळ गेले असता सासुरवाडीकडील लोकांनी मयताच्या नातेवाइकांना शिवीगाळ व अंगावर दगड घेऊन धावले असल्याचे सांगत आहेत. सचिन यांच्या पश्चात दोन मुले, पत्नी, आईवडील, भाऊ, भावजय असा परिवार आहे.