लोकमत न्यूज नेटवर्कहरिसाल (अमरावती) : हरिसाल येथील वनपरिक्षेत्र अधिकारी दीपाली चव्हाण आत्महत्या प्रकरणाच्या चौकशीसाठी राज्याच्या अपर पोलीस महासंचालक प्रज्ञा सरवदे यांनी हरिसाल येथे मंगळवारी प्रत्यक्ष भेट दिली. दीपाली चव्हाण यांच्या शासकीय निवासात वेगवेगळ्या खोल्यांमध्ये गेल्या. सरवदे यांनी तेथे २३ मिनिटे थांबून निरीक्षण नोंदविले.आत्महत्या प्रकरणात अप्पर प्रधान मुख्य वनसंरक्षक तथा क्षेत्रसंचालक श्रीनिवास रेड्डी यांच्यावरसुद्धा गंभीर आरोप झाले. त्यांच्या चौकशीसाठी प्रज्ञा सरवदे या २७ एप्रिल रोजी हरिसाल येथे पोहोचल्या. त्यांनी दीपाली चव्हाण यांचे पती राजेश मोहिते वनाधिकारी व कर्मचारी यांचे नोंदविलेले बयाण त्यावर प्रत्यक्ष बोलून पडताळणी केली. येथे तपास अधिकारी तथा उपविभागीय पोलीस अधिकारी पूनम पाटील, धारणीचे ठाणेदार विलास कुलकर्णी उपस्थित होते.
दीपालीची पर्स आणि २३ मिनिटे दीपाली चव्हाण हरिसाल येथे ज्या शासकीय निवासस्थानात राहत होत्या, त्या शासकीय निवासस्थानी मंगळवारी सकाळी ११.३३ वाजता अपर पोलीस महासंचालक प्रज्ञा सरवदे यांनी भेट दिली. दीपालीने जेथे स्वतःवर गोळी झाडली, तेथील बारीक-सारीक निरीक्षण नोंदविले. तेथे पडलेली दीपालीची पर्स उघडून पाहिली. काही कागदपत्रे होती, त्याचीही तपासणी केली. उपस्थित कर्मचाऱ्यांकडून कुलूप उघडायला लावून त्या खोलीची पाहणी केली. ११.५६ च्या सुमारास बाहेर पडल्या.
कार्यालय जाणे टाळले, अधिकाऱ्यांना ‘नो एंट्री’एकसदस्यीय समितीच्या प्रमुख प्रज्ञा सरवदे यांच्या हरिसाल येथील भेटीदरम्यान पोलिसांसह व्याघ्र प्रकल्पाचा मोठा ताफा तैनात होता. गुगामलचे प्रभारी उपवनसंरक्षक अविनाश कुमार, मेळघाटच्या उपवनसंरक्षक पीयूषा जगताप, अकोटचे उपवनसंरक्षक नवाकिशोर रेड्डी, परीविक्षाधीन उपवनसंरक्षक बबन जोसफ हे आयएफएस अधिकारीसुद्धा तैनात होते. मात्र, आत कुणालाच एन्ट्री नव्हती. दीपाली जेथे कार्यरत होत्या, त्या वनपरिक्षेत्र अधिकारी कार्यालयात जाणे सरवदे यांनी टाळले.