मूर्तिजापूर : तालुक्यातील फणी गावात एकटीच म्हातारी राहत असून ‘फणी गावावर ७० वर्षांच्या वृद्धेचे अधिराज्य’ असे वृत्त शुक्रवारी ‘लोकमत’ने प्रकाशित करताच, प्रशासन तातडीने फणी गावात दाखल झाले. अन्नपूर्णाबाईंना भेटून तहसीलदारांनी तात्पुरती मदत केली. तेव्हा ७० वर्षांच्या अन्नपूर्णाबाईंनी गहिवरून आपली कहाणी सांगितली.
काही वर्षांपूर्वी फणी गावाची दोनशेच्यावर लोकवस्ती होती. कालांतराने हळूहळू लोकांनी आपले गाव सोडले. २०११ च्या जनगणनेनुसार त्या गावात ३५ लोक राहत असल्याची नोंद आहे. परंतु प्रत्यक्षात फणी गावात एकटीच म्हातारी राहत आहे. काही दिवसांपूर्वी तिचे घर पावसाने क्षतिग्रस्त झाले असून बाजूच्या किणी गावात गुरांच्या गोठ्यात तिने तात्पुरता आश्रय घेतला आहे. धानोरा वैद्य, किणी, फणी ही तीन गावे मिळून धानोरा गट ग्रामपंचायत आहे. विशेष म्हणजे सरपंच फणी या गावच्या असून त्याही मूर्तिजापूर येथे राहतात. परंतु या गावात मोजकी घरे उभी असली तरी ती घरे अडगळीत पडलेली आहेत.
फोटो:
तीन महिन्यांचा अन्नधान्याचा साठा व आर्थिक मदतही!
तहसीलदार प्रदीप पवार यांनी या गावात भेट दिली असता, घराच्या आजूबाजूला असलेले गवत काढून आम्ही येथेच राहत असल्याचा आव सरपंचांनी आणला.
तहसीलदार प्रदीप पवार यांनी सहानुभूतीपूर्वक आस्थेने आजीबाईची विचारपूस करून तिला तिला धीर देत, दोन-तीन महिने पुरेल एवढे अन्नधान्य व इतर साहित्य देऊन आरोग्याची काळजी घेण्यासाठी आर्थिक मदतही केली.
लोकमतने प्रकाशित केलेल्या बातमीमुळे हा प्रकार उघडकीस आला. वृत्त वाचून आम्ही त्या गावात पोहोचलो. तेव्हा त्या गावात सध्या कोणीच राहत नाही, वृद्ध अन्नपूर्णाबाईसाठी श्रावणबाळ योजनेत तरतूद, अन्नपुरवठा योजनेअंतर्गत धान्य व घरकुलासाठी प्रयत्न करून तिची आर्थिक व राहण्याची समस्या लवकरच मार्गी लावू
-प्रदीप पवार, तहसीलदार, मूर्तिजापूर