पालकमंत्र्यांकडून सर्वोपचार रुग्णालयाचे ‘पोस्टमार्टेम’!

बायोमेडिकल वेस्ट वार्डातच पडून, स्वच्छतेच्या मुद्यावर पालकमंत्र्यांकडून कानउघाडणी.

अकोला- शासकीय वैद्यकीय महाविद्यालयाच्या सर्वोपचार रुग्णालयात रुग्णांची हेळसांड सुरू असून, स्वच्छतेचा बोजवारा उडाला. पालकमंत्री तथा गृह राज्यमंत्री डॉ. रणजित पाटील यांनी रुग्णालयाला आकस्मिक भेट दिली, तेव्हा हा सर्व प्रकार बघून त्यांनी रुग्णालय प्रशासन व वैद्यकीय अधिकार्‍यांची कानउघाडणी केली. रुग्णांना चांगली सेवा देण्यासाठी कारभार सुधारण्याची सूचना करण्यासोबतच रुग्णालयातील समस्या सोडविण्यासाठी शासनाकडे पाठपुरावा करण्याची ग्वाहीसुद्धा त्यांनी यावेळी दिली. सर्वोपचार रुग्णालयात रविवारी दुपारी १ वाजता पालकमंत्र्यांचा ताफा धडकताच प्रशासकीय व वैद्यकीय अधिकार्‍यांची धावाधाव सुरू झाली. त्यांनी प्रत्येक वार्डात जाऊन पाहणी केली असता तेथील अस्वच्छता, रुग्णांना मिळणारी दर्जाहीन सेवा बघून, त्यांनी अधिकार्‍यांना धारेवर धरले. सर्वच वार्डात बायोमेडिकल वेस्ट पडून होते. कुठेही स्वच्छता होत असल्याचे आढळून आले नाही. पालकमंत्री दाखल होताच सफाई कर्मचार्‍यांना बोलावून स्वच्छतेचे काम करण्यात आले. हा सर्व प्रकार कमी होता की काय, वार्डात रुग्णांना वेळेवर औषधोपचारही मिळत नसल्याचे दिसून आले. रुग्णांसोबत होत असलेली हेळसांड यापुढे खपवून घेणार नाही, असा इशारा पालकमंत्र्यांनी अधिकार्‍यांना दिला. स्वच्छता आणि रुग्णसेवेत निष्काळजीपणा करणार्‍या कर्मचारी व अधिकार्‍यांना नोटीस बजावण्याचा आदेश त्यांनी प्रशासकीय अधिकारी राजीव देशमुख यांना दिला. सीटी स्कॅन, क्ष-किरण कक्षाची तपासणी केली. तातडीचे अहवाल वैद्यकीय अधिकार्‍यांना ऑनलाइन मिळतील, अशी व्यवस्था करण्याचे निर्देश त्यांनी दिले. यावेळी पालकमंत्र्यांसोबत महापौर उज्‍जवला देशमुख, हरीश आलिमचंदानी, गोपी ठाकरे, किशोर मालोकार उपस्थित होते.