नेवासा फाटा येथे बैलगाडी संघटनेचा रास्ता रोको

नेवासा फाटा : राज्य सरकारने पेटा कायद्यांतर्गत बैलगाडी शर्यतीवर आणलेली बंदी त्वरित उठवावी, यासाठी नेवासा फाटा येथे बुधवारी नेवासा तालुका बैलगाडी संघटनेच्या वतीने रास्ता रोको आंदोलन करण्यात आले. स्वाभिमानी शेतकरी संघटनेने ही या आंदोलनाला पाठिंबा दिला आहे.

२००६ सालापासून सरकारने बैलगाडी शर्यतीवर बंदी आणली आहे. या निर्णयावर काही जणांकडून त्यावेळी नाराजी व्यक्त करण्यात आली हाेती. याच नाराजीच्या पार्श्वभूमीवर मध्यंतरी काही दिवस या शर्यतीला परवानगी देण्यात आली होती. मात्र त्यानंतर काही प्राणी मित्र संघटनांनी न्यायालयाचे दरवाजे ठोठावून तांत्रिक अडचणी आणत या बैलगाड्या शर्यती पुन्हा बंद पाडल्या.

पेटा कायद्यांतर्गत बैलगाडी शर्यतीवर आणलेली ही बंदी त्वरित उठवावी, अन्यथा यापुढील काळात मंत्रालयासमोर आणखी तीव्र आंदोलन करण्यात येईल, असा इशारा नेवासा तालुका बैलगाडी संघटनेच्या वतीने देण्यात आला आहे.

याप्रसंगी अंबादास कोरडे, बबनदादा लंघे, सचिन काळे, संदीप कर्डिले, गणेश झगरे, तेजस कर्डिले, पापा शेख, गणेश पाटील, दादासाहेब नाबदे, दौलत गणगे, राजू निकम, संपत नवथर, प्रकाश शिंदे, दादा सरोदे, बाळासाहेब साळवे आदींसह अनेक युवक शेतकरी पुत्र उपस्थित होते. नायब तहसीलदार संजय परदेशी यांनी निवेदन स्वीकारले. पोलीस निरीक्षक विजय करे यांच्या मार्गदर्शनाखाली पोलीस उपनिरीक्षक भरत दाते व सहकाऱ्यांनी चोख बंदोबस्त ठेवला.

110821\39191957-img-20210811-wa0008.jpg

बैलगाडी शर्यतीवरील बंदी उठवावी -

नेवासा फाटा येथे बैलगाडी संघटनेचे आंदोलन.