दोन्ही आमदारांकडून निवडणूक आल्यावर विकासकामांच्या गप्पा; राम शिंदे-रोहित पवारांवर सुनील शेळकेंचा घणाघात

आमदार सुनील शेळके यांची राम शिंदे-रोहित पवार यांच्यावर टीका

Sunil Shelke: आगामी नगरपरिषद निवडणुकीच्या रणधुमाळीत जामखेड शहराच्या पाणी, रस्ते आणि औद्योगिक विकासाच्या मुद्द्यांवरून राष्ट्रवादी काँग्रेसचे स्टार प्रचारक आमदार सुनील शेळके यांनी भाजपचे राम शिंदे आणि आमदार रोहित पवार यांच्यावर जोरदार टीका केली आहे. दोन्ही नेत्यांचे नाव न घेता, "निवडणूक आली की दोन्ही आमदार तळ ठोकून बसतात आणि विकासाच्या गप्पा मारतात," असा टोला शेळके यांनी लगावला.

जामखेड नगरपरिषद निवडणुकीतील राष्ट्रवादी काँग्रेसच्या (अजित पवार गट) उमेदवारांच्या प्रचारार्थ आयोजित जाहीर सभेत ते बोलत होते. आमदार शेळके यांनी जामखेड शहरातील समस्यांवर बोट ठेवत, दोन्ही आमदारांच्या कार्यकाळात विकासाची कामे झाली नसल्याचे स्पष्ट केले. "माजी आणि विद्यमान अशा दोन्ही आमदारांच्या दोन टर्म शहरात झाल्या आहेत. तरीही शहराला आठ दिवसांतून एकदा पाणी मिळते, रस्त्यांची कामे अर्धवट आहेत आणि शहर धुळीने माखलेले आहे. शहराच्या आर्थिक विकासासाठी अत्यंत महत्त्वाच्या असलेल्या औद्योगिक वसाहतीच्या स्थापनेलाही खोडा घालण्यात आला आहे. विकासकामांपेक्षा श्रेयवादाची लढाई या दोन नेत्यांमध्ये अधिक झाली, ज्यामुळे शहराचे नुकसान झाले," अशी टीका त्यांनी केली.

निवडणूक जवळ आली की हे दोन्ही नेते जामखेडमध्ये तळ ठोकून बसतात आणि मग विकासाचे स्वप्न दाखवतात. जनतेने आता त्यांच्या या गप्पांना बळी पडू नये, असे आवाहन त्यांनी केले. यावेळी सभेला उपस्थित असलेल्या अन्य नेत्यांनीही दोन्ही आमदारांवर जोरदार टीकास्त्र सोडले. कल्याण आखाडे म्हणाले की, "दोन आमदार असूनही जामखेडची स्थिती भकास आहे. निवडणुकीत जनता जर अरबी समुद्र द्या किंवा आकाशातील तारे द्या असे म्हणाले, तरी हे लगेच ते देण्याची तयारी दाखवतील. दोन्ही आमदार फक्त जनतेची दिशाभूल करत आहेत."

महेश निमोणकर यांनी कोविड काळातील स्थिती आठवण करून दिली. "कोरोनाच्या कठीण काळात एका आमदाराने टँकरचे पाणी बंद केले, तर दुसरा घरासमोरील झाडांना पाणी देत होता. हे सर्व जामखेडच्या जनतेने पाहिले आहे," असे निमोणकर म्हणाले.