साईमंदिर उघडण्यासाठी प्रयत्न करू

शिर्डी : साईमंदिर खुले करण्यासाठी शासनाला विनंती करू, कोरोनाच्या पार्श्वभूमीवर भाविकांच्या सुरक्षित व आनंददायी दर्शनासाठी प्रयत्न करू, अशी ग्वाही साईसंस्थानचे नवनिर्वाचित अध्यक्ष आमदार आशुतोष काळे यांनी दिली.

साईबाबा संस्थानच्या २० व्या व्यवस्थापन मंडळाचे अध्यक्ष म्हणून आमदार आशुतोष काळे यांनी शुक्रवारी दुपारी मध्यान्ह आरतीनंतर अध्यक्षपदाचा पदभार स्वीकारला. यावेळी डॉ. एकनाथ गोंदकर, सुरेश वाबळे, जयंतराव जाधव, अनुराधा आदिक, ॲड. सुहास आहेर, महेंद्र शेळके, अविनाश दंडवते, सचिन गुजर व नगराध्यक्ष शिवाजी गोंदकर या नवनिर्वाचित विश्वस्तांची उपस्थिती होती. सीईओ भाग्यश्री बाणायत यांनी नवनिर्वाचित अध्यक्ष व विश्वस्तांचे संस्थानच्या वतीने स्वागत केले.

पदभार स्वीकारल्यानंतर पत्रकारांशी बोलताना काळे म्हणाले, मंदिर उघडण्यासाठी शासनदरबारी प्रयत्न करणार आहे. त्यामुळे परिसराच्या अर्थकारणाला आधार मिळेल. भाविकांच्या सोयी-सुविधांसाठी तसेच पंचक्रोशीच्या विकासासाठी संस्थानच्या नियमांत राहून सर्वांशी समन्वय ठेवून काम करू, असे सांगितले.

शिर्डी नगरपंचायतच्यावतीनेही नगराध्यक्ष शिवाजी गोंदकर, नगरसेवक अभय शेळके, सुजीत गोंदकर, अशोक गोंदकर यांनी नवनिर्वाचित अध्यक्ष व विश्वस्तांचा सत्कार करत, नगरपंचायत व संस्थानचा समन्वय कायम ठेवण्याची अपेक्षा व्यक्त केली.

आमदार काळे पदभार स्वीकारण्यासाठी मंदिर परिसराजवळ येताच राष्ट्रवादी व ग्रामस्थांच्यावतीने गौतम बँकेचे अध्यक्ष बाबासाहेब कोते, राष्ट्रवादीचे रमेशराव गोंदकर, नीलेश कोते, अमित शेळके, दीपक गोंदकर, प्रकाश गोंदकर, अक्षय काळे आदींनी स्वागत केले.

..................

साईसंस्थानच्या व्यवस्थापनात सर्वपक्षिय सदस्य

राष्ट्रवादीचे आमदार आशुतोष काळे यांच्या अध्यक्षतेखाली व शिवसेनेचे नेते ॲड. जगदीश सावंत यांची उपाध्यक्षपदी तर काँग्रेस, राष्ट्रवादी व शिवसेनेच्या अन्य नऊ सदस्यांची नियुक्ती केली आहे. व्यवस्थापनात नगराध्यक्ष पदसिद्ध सदस्य असतात. सध्या भाजपचे शिवाजी गोंदकर नगराध्यक्ष असल्याने त्यांच्या रूपाने व्यवस्थापनात राष्ट्रवादी, शिवसेना, काँग्रेसबरोबरच भाजपचाही समावेश आहे.

.........

दोन अनुभवी विश्वस्तांचा समावेश

या व्यवस्थापनात डॉ. एकनाथ गोंदकर व सुरेश वाबळे यांच्यारूपाने अनुभवी विश्वस्तांचा समावेश आहे. डॉ. गोंदकर यांना मागील दोन टर्ममध्ये जवळपास तेरा तर वाबळे यांना मागील टर्ममध्ये आठ वर्षांचा व्यवस्थापनाचा अनुभव गाठीशी आहे.