सभापतीपदाच्या निवडणुकीला स्थगिती

रिसोड कृऊबास सभापतीपदाची निवडणूक : न्यायालयाचा आदेश.

रिसोड : स्थानिक कृषी उत्पन्न बाजार समितीच्या सभापतीपदाची निवडणूक दोन आठवड्याकरिता पुढे ढकलण्याचा निर्णय न्यायालयाने दिल्याने १३ नोव्हेंबरला ठरलेली सभापतीपदाची निवडणूक ऐनवेळी रद्द करण्यात आली आहे. रिसोड येथील कृषी उत्पन्न बाजार समितीच्या सभापती पदाबाबत गत वर्षभरापासून वाद सुरु आहे. न्यायालयातही प्रकरण गेलेले आहे. त्यामुळे न्यायालयाचा आदेश आणि स्थगिती हा प्रकार तालुकावासीयांसाठी काही नवीन राहिलेला नाही. माजी सभापती श्यामराव उगले यांचे संचालक पद बरखास्त झाल्यामुळे १३ नोव्हेंबर रोजी नवीन सभापती निवडीची प्रक्रिया सहायक निबंधक मार्फत राबविण्यात आली होती. या निवडणुकीसाठी संचालक मंडळातील सर्व १७ संचालकांना नोटीस बजाविण्यात आल्या होत्या. त्यानुसार बाजार समितीचे सर्व संचालक ठरलेल्या वेळेवर कृषी उत्पन्न बाजार समितीच्या सभागृहात उपस्थित झाले होते. सभा रितसर सुरु होण्यापूर्वीच न्यायालयीन आदेश व जिल्हा निबंधक यांचे पत्र तालुका सहायक निबंधकाकडे धडकले आणि निवडणूक कार्यक्रम ऐनवेळी रद्द करण्यात आला आहे. निवडणूक प्रक्रियेला १३ नोव्हेंबरपासून दोन आठवड्याकरिता अंतरिम स्थगिती देण्यात आली आहे. या प्रक्रियेकरिता सहायक निबंधक बी.एम.कोकाटे, आर.आर.सावंत यांची उपस्थिती होती. माजी सभापती उगले यांनी याबाबत नागपूर न्यायालयाकडे अपील सादर केले होते. त्यानुसार हा निर्णय देण्यात आला आहे. राज्यामध्ये मुदतवाढ कृषी उत्पन्न बाजार समिती बरखास्त करण्याची प्रक्रिया सुरु आहे. त्यामुळे येणार्‍या काही दिवसांमध्ये काय होणार, याबाबत चर्चा रंगत आहे.