आता ड्रोनद्वारे होऊ शकेल कीटकनाशक फवारणी

वाशिम: आता पिकांवरील कीड नियंत्रणात कीटकनाशक फवारणीसाठी शेतकऱ्यांना ड्रोनचा आधारही घेता येऊ शकणार आहे. शासनाच्या निर्देशानुसार ड्रोनद्वारे कीटकनाशक फवारणीचे प्रात्यक्षिक विविध जिल्ह्यांत कृषी विज्ञान केंद्राकडून केले जात आहे. कृषी विज्ञान केंद्र वाशिमनेही २ सप्टेंबर रोजी करडा येथील प्रक्षेत्रावर ड्रोनद्वारे कीटकनाशक फवारणीचे प्रात्यक्षिक सादर केले. अलीकडच्या काळात यांत्रिक शेतीवर अधिक भर दिला जात आहे, त्यामुळे खर्च आणि वेळेतही बचत होत आहे. पूर्वी पेरणीसाठी पारंपरिक पद्धतीत तिफण, बैलजोडी आणि मानवाचा वापर व्हायचा, सिंचनासाठी मोटेचा वापर करताना बैलजोडी व माणूसही लागत असे, तर कापणी आणि मळणीसाठीही मजुरांचा वापर होत असे, आता ही सर्व कामे यंत्राने होत असल्याने मजुरांचा वापर कमी झाला असून, वेळेची व पैशांचीही बचत होत आहे. आता त्यात फवारणीचाही समावेश होणार असून, आता फवारणीसाठी मजुराऐवजी ड्रोनचा वापर केला जाण्याची शक्यता आहे. महाराष्ट्रासह देशभरात याबाबतचे प्रात्यक्षिक कृषी विज्ञान केंद्राकडून केले जात आहे. कृषी विज्ञान केंद्र वाशिमच्या करडा येथील प्रक्षेत्रावरही ड्रोनद्वारे कीटकनाशक फवारणीचे प्रात्यक्षिक २ सप्टेंबरला घेण्यात आले. या कार्यक्रमास कृषी विज्ञान केंद्राचे वरिष्ठ शास्त्रज्ञ व प्रमुख डॉक्टर आर. एल. काळे, विषय विशेषज्ञ दिगंबर इंगोले, शुभांगी वाटाणे, प्रमोद देशमुख तसेच प्रगतिशील शेतकरी ज्ञानबा कोरडे, शुभम खडसे, दत्ता काळे, राम देशमुख, आदित्य देशमुख यांच्यासह कृषी महाविद्यालयाचे विद्यार्थी व शेतकरी मोठ्या संख्येने उपस्थित होते.

०००००००००००००००००००००

आधुनिक उपकरणांचा वापर ही काळाची गरज

शेतीमधील यांत्रिकीकरण व आधुनिक उपकरणांचा वापर ही काळाची गरज असल्याचे प्रतिपादन डॉ. रवींद्र काळे यांनी यावेळी केले. ड्रोनद्वारे फवारणीसाठी लागणाऱ्या औषधी व त्याचे प्रमाण तसेच फवारणी, योग्य पिके याबाबतीत अधिक अभ्यासाची गरज त्यांनी व्यक्त करून शेतीतील नवीन तंत्रज्ञान समजून त्याचा अवलंब करण्याचे आवाहनही त्यांनी यावेळी केले.

००००००००००००००००००००

सोयाबीन, तुरीवर फवारणी

कृषी विज्ञान केंद्राच्या प्रक्षेत्रावर सोयाबीन व तूर या पिकांमध्ये एक हेक्टर क्षेत्रावर ड्रोनद्वारे फवारणीचे प्रात्यक्षिक करून दाखविण्यात आले. कृषी अर्थशास्त्र प्रमुख इंगोले यांनी शेतकऱ्यांचा शेतीवर होणारा खर्च कमी करण्याच्या उद्देशाने ड्रोनसारख्या तंत्रज्ञानाचा फायदा होऊ शकेल, असे मत व्यक्त केले.