कोरोनाची येऊ घातलेली तिसरी लाट लक्षात घेता एसडीपीओ यशवंत केडगे व आसेगाव पोलीस स्टेशनचे ठाणेदार स्वप्नील तायडे यांनी केलेल्या समाजप्रबोधन व मार्गदर्शनामुळे सार्वजनिक गणेशोत्सव बंद ठेवून गणेशाची घरगुती पूजा करण्याचा निर्णय ५० गावच्या गणेश मंडळांनी घेतला आहे. यामुळे डीजे मिरणुका व इतर बाबींवर होणारा लाखोंचा खर्च बचत होऊन हा खर्च कोरोनाविरुद्धच्या लढाईवर खर्च करण्याचा निर्णय या गणेश मंडळांनी घेतला आहे.
कोरोनाची साखळी तोडून त्याला आपल्या गावाजवळ न येऊ देण्यासाठी सार्वजनिक उत्सव थांबविणे हाच एकमेव पर्याय आहे, असे आसेगावचे ठाणेदार तायडे यांना वाटले; परंतु हे शक्य नाही म्हणून त्यांनी एसडीपीओ यशवंत केडगे यांचे मार्गदर्शन घेतले. ५० गावच्या गणेश मंडळांसोबत बैठका घेऊन मार्गदर्शन केल्याने या गावांतील सार्वजनिक गणेशोत्सव रद्द करण्यात आला.
-----------------------------------
आपण केवळ मार्गदर्शन केले; परंतु आसेगाव पोलीस स्टेशनच्या हद्दीत गणेश मंडळांनी आपल्या आवाहनाला प्रतिसाद देत देशभक्ती जागृत करीत सार्वजनिक उत्सवाऐवजी घरगुती उत्सव करण्याचे मान्य करून कोरोना साखळी तोडण्यासाठी सज्ज झाले. तरुणाई या कार्यात सक्रिय झाल्याने परिवर्तन होणारच आहे.
य़शवंत केडगे
उपविभागीय पोलीस अधिकारी, मंगरूळपीर
----------------------------------
शासनाच्या नियमानुसार गणेशोत्सव साजरा करण्यास हरकत नाही; परंतु कोरोना आपल्या हातात नाही म्हणून तरुणांनी सार्वजनिक उत्सव साजरे करून त्याला आमंत्रण देऊ नये. आपल्या आवाहनानुसार घरगुती पद्धतीने गणेशोत्सव साजरा करणाऱ्या ५० मंडळांचा प्रमाणपत्र देऊन सत्कार करण्यात येणार आहे.
स्वप्नील तायडे,
ठाणेदार आसेगाव पोलीस स्टेशन
आमच्या गणेशोत्सव मंडळाने सार्वजनिक गणेशोत्सव रद्द करून यावरील होणारा खर्च कोरोनाविरुद्धच्या लढाईत होणाऱ्या विविध बाबींवर खर्च करण्यात येणार आहे, तसेच निराधार व गरजू व्यक्तींना अन्नधान्य वाटून गणेशाचा प्रसाद त्यांना घरपोच देणार आहाेत.
विठ्ठल उकंडा महल्ले
अध्यक्ष, वीर भगतसिंग सार्वजनिक गणेश मंडळ, दाभडी