जिल्हाधिकारी कार्यालयाच्या वाकाटक सभागृहात संबंधित अधिकारी व सार्वजनिक गणेश मंडळांच्या पदाधिकाऱ्यांसमवेत झालेल्या सभेत ते बोलत होते. यावेळी पोलीस अधीक्षक वसंत परदेशी, जिल्हा परिषदेचे प्रभारी मुख्य कार्यकारी अधिकारी विवेक बोंद्रे, अतिरिक्त पोलीस अधीक्षक विजयकुमार चव्हाण, निवासी उपजिल्हाधिकारी शैलेश हिंगे, उपविभागीय अधिकारी प्रकाश राऊत, राहुल जाधव, महावितरणचे कार्यकारी अभियंता रत्नदीप तायडे यांच्यासह उपविभागीय पोलीस अधिकारी, तहसीलदार, गट विकास अधिकारी, नगरपरिषद व नगरपंचायतींचे मुख्याधिकारी, सार्वजनिक गणेशोत्सव मंडळांचे पदाधिकारी उपस्थित होते.
जिल्हाधिकारी शन्मुगराजन एस. म्हणाले, कोरोना विषाणू संसर्गाच्या पार्श्वभूमीवर गतवर्षीप्रमाणेच यंदाही गणेशोत्सव साधेपणाने साजरा करावा. ग्रामीण भागात एक गाव एक गणपती तसेच शहरी भागात एक वाॅर्ड एक गणपती यासारखे उपक्रम राबवावेत. यंदाही गणेश आगमन व गणेश विसर्जनाच्या मिरवणुकीवर बंदी राहणार असून कोणत्याही सार्वजनिक मंडळाने अथवा घरगुती गणपतीच्या आगमनाप्रसंगी मिरवणूक आयोजित करू नये, असे आवाहन जिल्हाधिकाऱ्यांनी यावेळी केले.
..........................
कोरोना प्रतिबंधक लसीकरण मोहिमेसाठी सहकार्य करा
कोरोना संसर्गाची संभाव्य तिसरी लाट रोखण्यासाठी जिल्ह्यात कोरोना प्रतिबंधक लसीकरण मोहीम अधिक प्रभावीपणे राबविण्यासाठी जिल्हा प्रशासन प्रयत्नशील आहे. गणेशोत्सव काळात सार्वजनिक गणेशोत्सव मंडळांची लसीकरण मोहिमेच्या अनुषंगाने जनजागृती करावी. मंडळांच्या सहकार्याने कोरोना लसीकरण शिबिरे, कोरोना चाचणी शिबिरांचे आयोजन करून १८ वर्षांवरील पात्र व्यक्तींचे लसीकरण करण्यासाठी तसेच कोरोना चाचण्यांसाठी प्रशासनाला सहकार्य करण्याचे आवाहन जिल्हाधिकाऱ्यांनी केले.