कानगावच्या पशुवैद्यकीय अधिकाऱ्याला कारणे दाखवा नोटीस

बैलाचे शवविच्छेदन करण्यास टाळाटाळ करणाऱ्या कानगाव येथील पशुवैद्यकीय अधिकाऱ्याला कारणे दाखवा नोटीस व सभेला अनुपस्थित असलेल्या जिल्हा परिषदेच्या मुख्यकार्यपालन अधिकाऱ्यांना गैरहजर

वर्धा : बैलाचे शवविच्छेदन करण्यास टाळाटाळ करणाऱ्या कानगाव येथील पशुवैद्यकीय अधिकाऱ्याला कारणे दाखवा नोटीस व सभेला अनुपस्थित असलेल्या जिल्हा परिषदेच्या मुख्यकार्यपालन अधिकाऱ्यांना गैरहजर राहण्याच्या कारणाचे सात दिवसांत स्पष्टीकरण देण्यासंदर्भात देण्यात आलेल्या सूचनांनी जिल्हा परिषदेची सर्वसाधारण सभा गुरुवारी गाजली. जि.प. अध्यक्ष गैरहजर असल्याने उपाध्यक्ष विलास कांबळे यांनी सभेचे अध्यक्षपद भूषवित सभेची सूत्रे सांभाळली.
जिल्हा परिषदेच्या सभागृहात आज सर्वसाधारण सभा आयोजित होती. या सभेला जि.प. अध्यक्ष चित्रा रणनवरे या गैरहजर राहणार असल्याचे त्यांनी पूर्वीच कळविले होते. यामुळे उपाध्यक्ष सभेच्या अध्यक्षस्थानी होते. या सभेला जिल्हा परिषदेचे सर्वच सदस्य उपस्थित असल्याने विविध विषयावर चर्चा घडून आली. यावेळी विविध विषयावर सूचना करण्यात आल्या.
चर्चेदरम्यान कानगाव सर्कलच्या जि.प सदस्य ज्योती देशमुख यांनी येथील पशुवैद्यकीय रुग्णालयात होत असलेल्या अनागोंदीबाबत प्रश्न उपस्थित केला. त्यांनी येथील एका शेतकऱ्याच्या बैलाच्या मृत्यूचा प्रश्न सभागृहात मांडला. बैलाचा मृत्यू झाल्यानंतर त्याचे शवविच्छेदन करण्याकरिता पशुवैद्यकीय अधिकारी डॉ. पाटील यांनी टाळाटाळ केली. यामुळे बाहेर गावातून वैद्यकीय अधिकारी बोलावून त्या बैलाचे शवविच्छेदन करावे लागले. यावर सभागृहात चर्चा करून सदर वैद्यकीय अधिकाऱ्यांना कारणे दाखवा नोटीस बजावण्याबाबत सूचना करण्यात आल्या.
याचवेळी सभेला गैरहजर राहण्यासंदर्भात जिल्हा परिषदेचे मुख्यकार्यपालन अधिकारी उदय चौधरी यांनी सभाध्यक्षाकडे कुठलीही सूचना दिली नाही. नियमानुसार गैरहजर राहण्याबाबत सूचना करणे बंधनकारक आहे. या विषयावर चर्चा करून गैरहजर असलेल्या सीईओंना सात दिवसात अनुपस्थितीबाबत स्पष्टीकरण देण्याबाबत सूचना करण्यात आल्यात.
सीईओंच्या गैरहजेरीबाबत सभागृहात चांगलाच वादंग उठला. यावेळी सभेचे सचिव म्हणून उपमुख्यकार्यपालन अधिकारी राजेंद्र भूयार उपस्थित होते. या दोन विषयासह सभेत सदस्यांनी विविध विषय मांडले. सभेला सर्वच विषय समित्यांचे सभापती व अधिकारी उपस्थित होते.(जिल्हा प्रतिनिधी)