सदानंद नाईक -
उल्हासनगर: कॅम्प नं-४ सुभाष टेकडी परिसरातील तीन मजल्याच्या व्यंकटेश इमारतीची गॅलरी खालील दुकानावर कोसळली. सुदैवाने या घटनेत कुणीही जखमी झाले नाही. महापालिकेने सुरक्षेचा उपाय म्हणून इमारत खाली केली.
उल्हासनगरात इमारती स्लॅब, गॅलरी पडण्याचे सत्र सुरू असून धोकादायक व जुन्या इमारतींमधील नागरिक भीतीच्या छायेखाली आहेत. कॅम्प नं-४ सुभाष टेकडी परिसरात शनिवारी दुपारी २ वाजण्याच्या सुमारास २० वर्षां पूर्वीच्या जुन्या ३ मजली व्यंकटेश इमारतीची गॅलरी तळमजल्यावर असलेल्या दुकानावर कोसळली.
महापालिकेचे सहायक आयुक्त गणेश शिंपी, अग्निशमन दलाचे प्रमुख बाळू नेटके यांनी सुरक्षेचा उपाय म्हणून इमारत खाली केली. इमारतीला महापालिकेने यापूर्वी नोटीस दिल्याने ८ पैकी ५ प्लॉटधारकांनी यापूर्वीच इमारत खाली केली होती. स्थानिक समाजसेवक सुधीर बागुल यांनी इमारत खाली करण्यास सहकार्य केले असून इमारती भोवती सरंक्षण कठडे उभारण्याची मागणी केली. येथे गेल्या दोन महिन्यांपूर्वी इमारतीचे स्लॅब पडून १२ पेक्षा जास्त जणांचा बळी गेला आहे.
शहरातील धोकादायक व अनाधिकृत इमारती नियमित करण्यासाठी राज्य शासनाने एक कमिटी स्थापन करून, १५ दिवसांत अहवाल देण्याचे आदेश दिले आहेत. हा आदेश नगरविकास मंत्री एकनाथ शिंदे यांनी दिला आहे. मात्र १५ दिवस उलटूनही कमिटीने कोणताही अहवाल अद्याप दिला नसल्याने संताप होत आहे. शासनाने शहरात मोठी घटना घडण्यापूर्वी अवैध व जुन्या इमारतीं बाबत त्वरित निर्णय घेण्याची मागणी होत आहे. व्यंकटेश इमारत खाली केल्यानंतर,त्यामधील नागरिकांची महापालिकेने तात्पुरती राहण्याची व्यवस्था केल्याची माहिती सहायक आयुक्त गणेश शिंपी यांनी दिली.