मायक्रोसॉफ्ट २० लाख शिक्षकांना देणार AI चे प्रशिक्षण; विद्यार्थ्यांना तिसरीपासून एआय विषय शिकविला जाणार

Ai in school Education : मायक्रोसॉफ्टने भारतात 'एलिव्हेट फॉर एज्युकेटर्स' उपक्रम सुरू केला. २०३० पर्यंत २० लाख शिक्षकांना एआय (AI) कौशल्ये शिकवण्याचे उद्दिष्ट. आशियातील पहिल्या मोठ्या मोहिमेची सविस्तर माहिती वाचा.

नवी दिल्ली: तंत्रज्ञान क्षेत्रातील दिग्गज कंपनी मायक्रोसॉफ्टने भारतात शिक्षणाचे चित्र बदलण्यासाठी 'मायक्रोसॉफ्ट एलिव्हेट फॉर एज्युकेटर्स' या महत्त्वाकांक्षी उपक्रमाची घोषणा केली आहे. या उपक्रमांतर्गत २०२६ पासून २०३० पर्यंत भारतातील २० लाख शिक्षकांना कृत्रिम बुद्धिमत्ता आणि संगणकीय विचारांचे प्रशिक्षण दिले जाणार आहे. भारत हा आशियातील पहिला देश आहे जिथे हा कार्यक्रम इतक्या मोठ्या प्रमाणावर राबवला जाणार आहे.

भारतात २० कोटींहून अधिक विद्यार्थी आणि सुमारे १ कोटी शिक्षक आहेत. या प्रचंड लोकसंख्येला एआय साक्षर करण्यासाठी मायक्रोसॉफ्टने पुढाकार घेतला आहे. या उपक्रमाचा फायदा २,००,००० पेक्षा जास्त शाळांना होणार असून २५,००० हून अधिक संस्थांमध्ये एआय सज्जता निर्माण केली जाईल. दिल्लीतील ७५ 'सीएम श्री' शाळांपासून या क्रांतीची सुरुवात होणार आहे.

मानव-केंद्रित एआय शिक्षणावर भर
मायक्रोसॉफ्टचे उपाध्यक्ष ब्रॅड स्मिथ यांनी स्पष्ट केले की, "एआय शिक्षणाचा भाग बनत असताना मानवी निर्णय आणि विश्वास कायम ठेवणे आमचे ध्येय आहे." तर मायक्रोसॉफ्ट इंडियाचे अध्यक्ष पुनीत चंडोक यांनी सांगितले की, "आम्ही भारताच्या एआय-फर्स्ट भविष्याचे रचनाकार म्हणून शिक्षकांमध्ये गुंतवणूक करत आहोत."

हा उपक्रम पूर्ण करणाऱ्या शिक्षकांना राष्ट्रीय शैक्षणिक आराखड्याशी सुसंगत नवीन एआय साक्षरता प्रमाणपत्र दिले जाईल. २० लाख शिक्षकांचा एक विशाल समुदाय तयार केला जाईल, जिथे ते एकमेकांकडून शिकू शकतील. सरकारी संस्थांच्या मदतीने २५,००० संस्थांमध्ये 'एआय राजदूत' आणि उत्कृष्टता केंद्रे उभारली जातील. हा कार्यक्रम सीबीएसई, एनसीईआरटी आणि एआयसीटीई यांसारख्या प्रमुख राष्ट्रीय संस्थांच्या सहकार्याने राबवला जाणार असून, नवीन शैक्षणिक धोरण नुसार तिसरीपासून एआय विषयाचा समावेश करण्यास मदत करेल.