"आमच्यामुळे राज-उद्धव एकत्र"; प्रताप सरनाईक यांची स्पष्ट प्रतिक्रिया

एकमेकांच्या घरी चहा-जेवणाला गेले तर त्यात बातमीसारखे काही नाही, असेही सरनाईक यांनी म्हटलं.

सोलापूर : राज आणि उद्धव हे एकाच घरातील, एकाच संस्कृतीतले. ते एकमेकांच्या घरी चहा-जेवणाला गेले तर त्यात बातमीसारखे काही नाही. ते एक कुटुंब आहे, एकमेकांच्या सुख-दुःखात जाणे स्वाभाविक आहे. राजकारणाने त्यात अर्थ आणू नका. तसेच, आमच्यामुळे हे दोघे भाऊ पुन्हा जवळ आले, याचा आम्हाला आनंद आहे, अशी प्रतिक्रिया परिवहनमंत्री प्रताप सरनाईक यांनी पत्रकारांशी बोलताना दिली.

शुक्रवारी दुपारी सोलापूर बस स्थानकाची पाहणी केल्यानंतर ते पत्रकारांशी बोलत होते. राणे बंधूंबाबत विचारलेल्या प्रश्नाला उत्तर देताना सरनाईक म्हणाले, हा दोन भावांमधील वैयक्तिक वाद नाही. पैशांच्या वाटपाबाबत काही तक्रारी असतील तर त्याची माहिती पोलिस किंवा प्रशासनाला देण्याचा अधिकार कोणालाही आहे. यात भांडण कुठे? नीलेश राणे हे शिवसेनेचे आमदार आहेत, नितेश राणे मंत्री आहेत. दोघेही लोकांचे प्रश्न पुढे आणतात. त्यांची भूमिका वेगळी असू शकते, पण ते भांडताहेत असे नाही.

रवींद्र चव्हाण यांच्या वक्तव्यावर बोलताना सरनाईक म्हणाले की, युतीबाबत २ डिसेंबर म्हणाले; पण, कोणते वर्ष सांगितले? त्यांच्या वक्तव्याचा गैरअर्थ लावण्याचे काही कारण नाही. ते माझे बालपणापासूनचे मित्र आहेत. युतीबाबत माध्यमांत येणाऱ्या चर्चा या अनावश्यक अटकळ असल्याचे ते म्हणाले.

शाळकरी मुलांच्या सुरक्षिततेसाठी हॉटलाइन

शाळकरी मुलांच्या वाहतुकीबाबत बोलताना सरनाईक म्हणाले, राज्यात आम्ही स्पष्ट सूचना दिल्या आहेत की शाळकरी विद्यार्थी वेळेत घरी पोहोचले पाहिजेत. एसटी महामंडळाने यासाठी हॉटलाइन सुरू केली आहे. विद्यार्थ्यांना काही अडचण असल्यास ते थेट संपर्क करू शकतात. मला सर्वांत समाधान वाटते ते म्हणजे, सरकार विद्यार्थ्यांच्या तक्रारी तत्काळ ऐकतेय. यामुळे मुलांना सुरक्षिततेचे बळ मिळत आहे.