जालौन: सोशल मीडियावर नेहमीच काही ना काही अनोख्या घटना व्हायरल होत असतात. काही गोष्टी तर अशा असतात की, ज्यांच्यावर विश्वास ठेवणेही कठीण असते. उत्तर प्रदेशातून एक अशीच विचित्र घटना समोर आली आहे. कारण इथे एका तरूणीने आपल्या म्हशी हरवल्याच्या शुल्लक कारणावरून आपले जीवन संपवले आहे. या मुलीला म्हशींची एवढी सवय झाली होती की, म्हशी घरी न परतल्याने ती व्यथित झाली आणि अखेर तिने टोकाचे पाऊल उचलले. आपल्या घरातील काही सदस्यांना शोधण्याचा मुलीने खूप प्रयत्न केला. परंतु, दुर्दैवाने त्यात यश आले नाही.
ही घटना उत्तर प्रदेशातील जालौनमधील कुरोना गावात घडली आहे. तेथील रहिवासी बॅनी केवट यांनी एकून ३ म्हशी पाळल्या होत्या. या सर्व म्हशींची देखभाल त्यांची मुलगी रजनी करत होती त्यामुळे तिला त्यांची खूप सवय झाली. या म्हशींची सगळी व्यवस्था रजनी करत असल्यामुळे अचानक तिन्ही म्हशी गायब झाल्याचा तिला धक्का बसला.
म्हशी हरवल्याने केली आत्महत्या
मृत तरूणी रजनीच्या वडिलांनी दिलेल्या माहितीनुसार, ८ जुलै रोजी सर्व म्हशींना नेहमीप्रमाणे चरायला सोडले होते. मात्र, त्या दिवशी म्हशी माघारी परतल्याच नाहीत. अचानक सर्व म्हशी गायब झाल्याने रजनी खूप व्यथित झाली होती. ती सतत विचार करत बसायची आणि २० जुलै रोजी तिने गळफास घेऊन आपले जीवन संपवले. तिने आत्महत्या केल्याची माहिती मिळताच आम्ही तिला औराई येथून झाशीच्या वैद्यकीय महाविद्यालय येथे पुढील उपचारांसाठी नेले होते. मात्र, उपचारादरम्यान तिचा मृत्यू झाला.