Fuel Price Hike: मोठी बातमी! पेट्रोल-डिझेल पुन्हा महागले; पाहा मुंबई, पुण्यातील आजचे वाढलेले दर...

Petrol Diesel Price Today news: अवघ्या आठवड्याभरापूर्वीच केंद्र सरकारने देशभरात पेट्रोल-डिझेलच्या दरात ३ रुपयांची वाढ केली होती, त्यानंतर लागोपाठ झालेली ही दुसरी दरवाढ आहे.

नवी दिल्ली: जागतिक बाजारपेठेत क्रूड ऑईलच्या (कच्चे तेल) किमतीत होत असलेल्या प्रचंड चढ-उतारामुळे देशांतर्गत इंधन दरांचा भडका उडाला आहे. मंगळवारी देशभरात पेट्रोल आणि डिझेलच्या किमतीत पुन्हा एकदा वाढ करण्यात आली आहे. पेट्रोल प्रतिलिटर ८७ पैशांनी तर डिझेल प्रतिलिटर ९१ पैशांनी महागले आहे. विशेष म्हणजे, अवघ्या आठवड्याभरापूर्वीच केंद्र सरकारने देशभरात पेट्रोल-डिझेलच्या दरात ३ रुपयांची वाढ केली होती, त्यानंतर लागोपाठ झालेली ही दुसरी दरवाढ आहे.

मुंबईत पेट्रोल १०७.५९ रुपये प्रतिलिटरवर पोहोचले आहे. तर डिझेल 94.08 रुपयांवर गेले आहे. 

दिल्ली-NCR मध्ये सीएनजी (CNG) देखील महागला!
पेट्रोल-डिझेलच्या दरवाढीचा फटका आता सीएनजी वाहनधारकांनाही बसला आहे. दिल्ली आणि परिसरात (NCR) रविवारी सीएनजीच्या दरात प्रति किलो १ रुपयाची वाढ करण्यात आली. दोन दिवसांतील ही दुसरी वाढ आहे. या नवीन वाढीमुळे दिल्लीत सीएनजी ८०.०९ रुपये प्रति किलो झाला आहे, तर नोएडा आणि गाझियाबादमध्ये हा दर ८८.७० रुपये प्रति किलोवर पोहोचला आहे.

दरवाढीचे मुख्य कारण काय?
जागतिक तेल बाजारातील अनिश्चिततेमुळे आंतरराष्ट्रीय स्तरावर ब्रेंट क्रूडच्या किमती प्रति बॅरल १०० डॉलर्सच्या पार गेल्या आहेत. अमेरिका, इस्रायल आणि इराण यांच्यातील वाढत्या भू-राजकीय तणावामुळे जागतिक क्रूड पुरवठा साखळी विस्कळीत झाली असून त्याचा थेट परिणाम भारतावर होत आहे.

केंद्रीय मंत्र्यांचा दरवाढीवर बचाव
दरम्यान, केंद्रीय मंत्री किरेन रिजिजू यांनी या इंधन दरवाढीचे समर्थन केले आहे. "पश्चिम आशियातील (मिडल ईस्ट) संकटामुळे अनेक देशांना इंधन दरवाढीचा मोठा फटका बसला आहे. मात्र, त्या देशांच्या तुलनेत भारताने इंधनावरील दरवाढ बऱ्याच अंशी नियंत्रणात ठेवली आहे," असा दावा त्यांनी केला.