कणकवली : अवकाळी पावसाने शेतकऱ्यांचे मोठे नुकसान झाले आहे . या शेतकऱ्यांना हेक्टरी ८ हजार रुपये नुकसान भरपाई राज्यपालांनी मंजूर केली आहे . मात्र , ही भरपाई आम्हाला मान्य नाही. हेक्टरी ५० ते ६० हजार रुपये भरपाई द्यावी , अशी मागणी यापूर्वी आम्ही केली होती . त्यामुळे शेतकऱ्यांना हेक्टरी किमान २५ हजार रुपये तरी भरपाई मिळालीच पाहिजे. तसेच शेतकऱ्यांचे शेतीकर्ज तत्काळ माफ करण्यात यावे , अशी मागणी शिवसेनेच्यातीने एका निवेदनाद्वारे कणकवली तहसिलदारांकडे करण्यात आली आहे.
कणकवली तालुका शिवसेनेच्या शिष्टमंडळाने सोमवारी तहसिलदार आर . जे . पवार यांची भेट घेऊन अवकाळी पाऊस नुकसाणीबाबत चर्चा केली. तसेच मागण्यांबाबत निवेदनही दिले . यावेळी कोकण सिंचन महामंडळाचे माजी उपाध्यक्ष संदेश पारकर , तालुकाप्रमुख शैलेश भोगले , प्रथमेश सावंत , संदेश पटेल , अॅड . हर्षद गावडे , महिला आघाडी जिल्हाप्रमुख निलम सावंत - पालव , उपजिल्हाप्रमुख राजू शेटये , सुजित जाधव , नगरसवक सुशांत नाईक , माहि परूळेकर , कन्हैया पारकर , प्रतिक्षा साटम , साक्षी आमडोसकर , राजू राठोड , राजू राणे , प्रसाद अंधारी , शेखर राणे , भालचंद्र दळवी . धनंजय सावंत , शरद वायंगणकर , रुपेश आमडोसकर , बंडू ठाकूर , अविनाश सापळे , उमेश घाडीगांवकर , दिलीप मर्ये , रिमेश चव्हाण , संजना कोलते , आनंद आचरेकर , प्रतिक्षा साटम , मिनल म्हसकर , विलास गुडेकर , जयबा कुरेशी , आनंद आचरेकर , सोमा गायकवाड , नासिर खान , अनुप वारंग , वाय . डी . सावंत यांच्यासहीत शिवसैनिक मोठ्या संख्येने उपस्थित होते .
यावेळी कणकवली तालुक्यातील शेतकऱ्यांचे ६०७२ हेक्टर क्षेत्राचे नुकसान झाले आहे . त्याबाबत पंचनामे करून अहवाल गेला असून आतापर्यंत १ कोटी १५ लाख रुपये जमा झालेले आहेत . रक्कम तत्काळ वाटप करण्यात येत असल्याचे तहसिलदार पवार यांनी स्पष्ट केले . शिवसेनेच्या शिष्टमंडळाने तहसीलदारांना दिलेल्या निवेदनात म्हटले आहे की, शेतकऱ्यांना शेतीसाठी प्रती हेक्टरी ५० ते ६० हजार खर्च येतो . मात्र , राज्यपालांनी ८ हजार रुपये हेक्टरी भरपाई जहिर केली . ती भरपाई तुटपुंजी आहे . शेतकऱ्यांना हेक्टरी २५ हजार रुपये तरी भरपाई मिळाली पाहिजे . तसेच शेतकऱ्यांना प्रधानमंत्री सन्मान योजनेचे प्रती हेक्टरी ६ हजार रुपये अद्याप जमा झालेले नाहीत . ही रक्कम त्वरीत जमा झाली पाहिजे . पिक विमा योजनेची रक्कम अद्याप शेतकऱ्यांना मिळालेली नाही . ती लवकरात लवकर मिळावी .
बऱ्याच ठिकाणी शेतकरी कसत असलेले क्षेत्र हे देवस्थान इनाम किंवा कुळ अगर तोंडी कराराने कसत असतात . त्यामुळे भरपाईची रक्कम अदा करताना खात्री करण्यात यावी . खरीप हंगामामध्ये जिल्हा बँक व राष्ट्रीयकृत बँका यांच्याकडून जिल्ह्यात सुमारे ८० कोटी एवढी रक्कम पिक कर्ज म्हणून वाटप करण्यात आलेली आहे .
या पिककर्जाचे मुद्दल व व्याज माफ करण्यात यावे . ज्या शेतकऱ्यांच्या मालमत्तेचे नुकसान झालेले आहे . अशांच्या बाबतीत व्यक्तिगत पातळीवर पंचनामा होऊन त्यांनाही योग्य ती भरपाई मिळावी . अतिवृष्टीमुळे गुरांसाठी असलेला चारा कुजून गेला आहे . त्यामुळे पशुधन असणाऱ्या शेतकऱ्यांना चाऱ्यासाठी अनुदान वा चारा छावणी उभारण्यात यावी .
तालुक्यातील शेतकऱ्यांनी शेतीपुरक खावटी कर्ज घेतेलले आहे . या शेतकऱ्यांना छत्रपती शिवाजी महाराज सन्मान योजना २०१७ खाली कर्जमाफी जाहिर झाली असून त्यांचा लाभ अद्यापही शेतकऱ्यांना मिळालेला नाही . त्यामुळे शेतकऱ्यांना नविन कर्ज घेता येत नाही व व्याजाचा बोजाही वाढत आहे .त्यामुळे खावटी कर्ज घेतलेल्या शेतकऱ्यांना तत्काळ कर्जमाफी मिळावी , अशी मागणी यावेळी करण्यात आली . शेतकरी सन्मान योजनेची रक्कम जिल्हा बँकेतील खात्यांमध्ये जमा होत नाही , ती होण्याच्यादृष्टीने कार्यवाहीची करण्यात यावी . अशा विविध मागण्या या निवेदनाद्वारे करण्यात आल्या आहेत.
कणकवली तहसीलदार आर जे पवार यांना सोमवारी शिवसेनेच्यावतीने निवेदन देण्यात आले. यावेळी संदेश पारकर, शैलेश भोगले, प्रथमेश सावंत, सुजित जाधव, नीलम सावंत- पालव , हर्षद गावडे आदी उपस्थित होते.