लोकमत न्यूज नेटवर्क
नागठाणे : ‘उत्तम आरोग्यासाठी ज्वारीची भाकरी आहारात नियमितपणे असणे आवशक आहे,’ असे मत सरपंच रूपाली बेंद्रे यांनी व्यक्त केले. कृषी विभाग आयोजित रब्बी ज्वारी प्रकल्प शेतीदिन या कार्यक्रमात त्या बोलत होत्या.
या वेळी उपसरपंच अनिल साळुंखे, कृषी विज्ञान केंद्र बोरगावचे विषय विषयज्ज्ञ संग्राम पाटील, महेश बाबर, कृषी पर्यवेक्षक रोहिदास तिटकारे आदी उपस्थित होते.
डॉ. बेंद्रे म्हणाल्या, ‘ज्वारीची भाकरी ही पचनास हलकी असल्याने आजच्या धावपळीच्या जीवनात आजारांना दूर ठेवण्यास मदत करते. ज्वारीच्या लाह्या, शेवया, पापड यासारखे ज्वारीचे पदार्थ खाणे हे आरोग्यास हितकारक आहे. यातून शेतकरी बचतगटांना रोजगाराच्या संधीही उपलब्ध होतील.
कृषी विज्ञान केंद्र बोरगावचे विषय विषयज्ज्ञ संग्राम पाटील यांनी सध्याच्या अवकाळी पाऊस तसेच बदलत्या हवामानात रब्बी ज्वारी, हरभरा, गहू, आले, ऊस, भाजीपाला या पिकांची काळजी कशी घ्यावी, याबद्दल सविस्तर मार्गदर्शन केले. महेश बाबर यांनी शेतकऱ्यांनी विचारलेल्या विविध शंकांचे निरसन केले. या कार्यक्रमास नागठाणे ग्रामपंचायतीचे नवनिर्वाचित सदस्य किरण साळुंखे, राजेंद्र साळुंखे, बापूराव मोहिते, पवन कदम, सुनील साळुंखे, संचालक शंकर साळुंखे उपस्थित होते.
कार्यक्रमाचे प्रास्ताविक कृषी सहायक अंकुश सोनावले यांनी केले. प्रगतशील शेतकरी संतोष साळुंखे यांनी आभार मानले.