कराड : टाळगाव (ता. कराड) येथे सातारा जिल्हा कबड्डी असोसिएशन व सनसनाटी स्पोर्ट्स क्लब यांच्या संयुक्त विद्यमाने आयोजित केलेल्या कुमार, कुमारी जिल्हा स्तरीय कबड्डी अजिंक्यपद स्पर्धेत मुलांमध्ये सिद्धिविनायक मंडळ सातारा तर मुलींमध्ये शिवाजी उदय सातारा या संघाने अजिंक्यपद पटकावले. या कबड्डी स्पर्धेत उत्कृष्ट खेळ प्रदर्शन घडवणाऱ्या कबड्डी खेळाडूंची जळगाव येथे होणाऱ्या राज्यस्तरीय स्पर्धेसाठी निवड झाली आहे. मुलांच्या गटात शिवछावा सवादे तर मुलींमध्ये शेरे कबड्डी संघ यांनी उपविजेतेपद पटकावले.
स्पर्धेचे उद्घाटन यशवंतराव मोहिते कृष्णा सहकारी साखर कारखान्याचे माजी अध्यक्ष इंद्रजित मोहिते यांच्या हस्ते करण्यात आले. स्पर्धेला रयत कारखान्याचे अध्यक्ष ॲड. उदयसिंह पाटील, पंचायत समिती सदस्य काशिनाथ कारंडे यांनी भेट देऊन उपस्थित खेळाडूंचे कौतुक केले. या स्पर्धा दोन दिवस सुरू होत्या पंच म्हणून उमेश साबळे, काका भिसे, विनोद पाटील, तानाजी देसाई, निवास पाटील, शशिकांत यादव, शांताराम सपकाळ, उमेश जाधव, अविनाश पाटील, रवींद्र सपकाळ, सुरेश पाटील यांनी काम पाहिले. विजेत्या संघांना सनसनाटी स्पोर्ट क्लबच्या कार्यकर्त्यांच्या हस्ते बक्षीस देऊन सन्मानित करण्यात आले.
रमेश थोरात यांनी खेळाचे सूत्रसंचालन केले. सुरेश पाटील यांनी स्वागत केले. अविनाश पाटील यांनी आभार मानले. या स्पर्धा यशस्वी करण्यासाठी सनसनाटी स्पोर्ट्स क्लबच्या कार्यकर्त्यांनी परिश्रम घेतले.
फोटो ओळी
टाळगाव. ता. कराड येथे जिल्हा कबड्डी अजिंक्यपद स्पर्धेत मुलींच्या अंतिम विजेत्या संघाला बक्षीस वितरण करताना विनोद पाटील, शांताराम सपकाळ, सुरेश पाटील आदी.
24 pramod 03