भाजपच्या ‘साताऱ्या’तून शिवसेनेचे दगडू सकपाळ

उद्धव ठाकरेंचा निर्णय : दोन दिवसांत अर्ज भरण्याचा आदेश

सातारा : परळचे माजी आमदार दगडू सकपाळ यांची सातारा-जावळी विधानसभा मतदारसंघातून शिवसेनेचे अधिकृत उमेदवार म्हणून सोमवारी रात्री उशिरा शिक्कामोर्तब झाले. दरम्यान, भाजपकडे असलेल्या मतदारसंघात शिवसेनेचा उमेदवार जाहीर झाल्यामुळे राजकीय वर्तुळात खळबळ उडाली आहे.महायुतीचा तोडगा दृष्टिक्षेपात नसल्याचे स्पष्ट होताच उद्धव ठाकरेंनी राज्यातील बहुतांशी मतदारसंघांतील उमेदवारांची नावे निश्चित केली. रात्री उशिरा ‘मातोश्री’वर राजकीय खलबते वेगाने सुरू होती. उद्धव ठाकरे, खा. संजय राऊत, दिवाकर रावते यांची चर्चा झाल्यानंतर साताऱ्यातून माजी आ. दगडू सकपाळ यांचे नाव पुढे आले आणि त्यांना साताऱ्यातून शिवसेनेचे आपणच अधिकृत उमेदवार असून, दोनच दिवसांत जाऊन अर्ज भरण्याचे आदेशही दिले. सातारा-जावळी मतदारसंघ युतीच्या काळात भाजपकडे होता. मात्र, आता महायुतीतील गोंधळामुळे शिवसेनेचे दगडू सकपाळ यांच्या नावाची घोषणा झाली. सकपाळ शिवसेनेच्या स्थापनेपासून दिवंगत बाळासाहेब ठाकरे यांच्याबरोबर कार्यरत राहिले आहेत. त्यांनी परळ विधानसभा मतदारसंघाचे नेतृत्व केले असून, ते मूळचे महाबळेश्वर तालुक्यातील अहिरे-वानवली (पूर्वी जावळी तालुका) येथील आहेत. २००८ च्या दरम्यान, ते सातारा जिल्हा संपर्कप्रमुखही होते. शिवसेना कार्याध्यक्ष उद्धव ठाकरे यांनी माझ्या उमेदवारीचा निर्णय घेतल्यामुळे मी आता सातारा-जावळी मतदारसंघातून लढणार आहे. माझ्या उमेदवारीची माहिती शिवसैनिकांना देण्यात आली आहे. दोनच दिवसांत मी साताऱ्यात येणार असून, शुक्रवारी अथवा शनिवारी अर्ज दाखल करणार आहे.- दगडू सकपाळ, माजी आमदारकऱ्हाड दक्षिण, उत्तरचा निर्णय अधांतरीसातारा जिल्ह्यातील उर्वरित मतदारसंघांच्या नावाबाबत रात्री उशिरापर्यंत खलबते सुरू होती. ‘मातोश्री’वरून मिळालेल्या माहितीनुसार, महाबळेश्वरचे माजी नगराध्यक्ष डी. एम. बावळेकर वाई, तर माजी आ. शंभूराज देसाई पाटण आणि फलटणमधून चंद्रकांत तासगावकर यांच्या नावाची घोषणा दोन दिवसांत होणार आहे. कोरेगावातून हणमंत चवरे, बाळासाहेब फाळके, दिनेश बर्गे यांच्यापैकी कोणाचे नाव निश्चित करायचे, यावर विचारमंथन चालले होते. कऱ्हाड उत्तर, कऱ्हाड दक्षिणच्या उमेदवारीचा निर्णय झाला नव्हता.