कुडाळ : कुडाळ (ता. जावळी) येथे पानस-कुडाळ रस्त्यालगत असणाऱ्या शेडच्या पाठीमागे अवैधरीत्या दारू विकत असताना संशयित म्हणून शंकर रामचंद्र पवार व विक्रम उत्तम पवार (दोघेही राहणार कुडाळ) यांना मेढा पोलीस ठाण्याचे सहायक पोलीस निरीक्षक अमोल माने यांनी दारू विक्री करताना पकडले. त्यांच्याकडून देशी व विदेशी दारू आणि यासाठी वापरात आलेली जीप असा एकूण ४ लाख ६३ हजार ५०८ रुपयांचा मुद्देमाल जप्त केला आहे.
मेढा पोलिसांनी दिलेल्या माहितीनुसार कुडाळ-पानस रोडवर गेल्या काही दिवसांपासून अवैधरीत्या दारूविक्री होत असल्याची माहिती पोलिसांना मिळाली होती. यानुसार मेढा पोलीस स्थानकाचे सहायक पोलीस निरीक्षक अमोल माने व पोलीस कर्मचारी यांनी घटनास्थळावर छापा टाकून देशी दारूचे तीन बॉक्स व विदेशी दारूचे दोन बॉक्स अशी अंदाजे १३ हजार ५०८ किमतीची दारू तसेच दारू वाहतुकीस वापरण्यात येणारी (एमएच ११ सीक्यू ७४२१) अंदाजे ४ लाख ५० हजार किमतीची गाडी जप्त केली आहे.