गावोगावी सायकलवर रुग्णांना मोफत सेवा

वय वर्ष पासष्ठ : पदरमोड करत जोपासली सामाजिक बांधिलकी

प्रमोद सुकरे-कऱ्हाड--‘रुग्णसेवा हीच खरी ईश्वर सेवा,’ असे वैद्यकीय व्यवसायाचे ब्रीदवाक्य मानले जाते; परंतु अलीकडच्या काळात वैद्यकीय व्यवसायाबाबत जनमानसात समज-गैरसमज निर्माण होऊ लागले आहेत. या सगळ्या परिस्थितीत कोणतीही वैद्यकीय पदवी नसताना कऱ्हाडातील एक व्यक्ती रुग्णसेवेसाठी झपाटल्यासारखे काम करत आहे. स्वत:चा वेळ आणि पैसा खर्च करून जात, धर्म न पाहता गरीब आणि गरजू ज्येष्ठ नागरिक व रुग्णांना मोफत सेवा देणाऱ्या त्या अवलियाचे नाव पी. डी. निलाखे असे आहे.‘कोर्टाची पायरी शहाण्या माणसाने चढू नये, असं म्हणतात. तसेच दवाखान्याची पायरी कुठल्याही माणसाला चढायला लावू नये, हेही तितकेच खरे. त्यातच ती व्यक्ती गरीब कुटुंबातील असेल, तर त्याच्यावर उपचार करणे आणि त्याची काळजी घेणे अवघड होऊन बसते; परंतु समाजसेवेचे व्रत घेतलेल्या पी. डी. निलाखे यांनी गेल्या तीन-चार वर्षांपासून अशा ज्येष्ठ नागरिकांचा व गरीब, गरजू रुग्णांचा उपक्रम चालू ठेवला आहे. पी. डी. निलाखे अशा रुग्णांचा शोध घेतात. त्या व्यक्तींपर्यंत सायकलवरून पोहोचतात. त्याला स्वत: आयुर्वेदिक तेलाच्या साह्याने मालिश करतात. स्वत: घेऊन गेलेल्या साबणाने अंघोळ घालत नवीन टॉवेलने पुसतात आणि कोणताही मोबदला न घेता ते परततात.आजच्या धावपळीच्या युगामध्ये आपण आपल्या घरातील ज्येष्ठांना आणि रुग्णांना वेळ देऊ शकत नाही. अशा वेळी निलाखे यांच्या कृतीतून समाजाच्या डोळ्यात अंजन घालण्याचाच प्रयत्न होताना दिसून येत आहे. त्यांच्या या उपक्रमाचे आज विविध स्तरांतून कौतुक होते खरे; पण यातून प्रत्येकांनी काहीतरी बोध घेतला. कुटुंबातील ज्येष्ठ नागरिकांची काळजी घेतली.रुग्णांची सेवा केली तर खऱ्या अर्थाने संस्काराची शिदोरी आपल्या गाठीशी आहे, असे म्हणता येईल. (प्रतिनिधी)सेवानिवृत्तीनंतर उरलेल्या आयुष्यातही आपण समाजाची सेवा करावी म्हणून मी हे काम करीत आहे. पहिल्यापासून सायकलवरून फिरण्याची सवय असल्यामुळे कऱ्हाड शहर व ग्रामीण भागातील गरजू रुग्ण व ज्येष्ठ नागरिकांच्या घरी जाऊन मी सेवा करतो. सायकल चालविल्याने माझे आरोग्यही चांगले राहते.- पी. डी. निलाखेप्रांताधिकाऱ्यांकडूनही दखलपी. डी. निलाखे यांच्या कार्याची दखल घेत कऱ्हाडचे प्रांताधिकारी किशोर पवार यांनी त्यांचा नुकताच त्यांचा सत्कारही केला. तसेच समाजसेवेच्या कामासाठी मदत म्हणून काही रक्कमही देऊ केली. यावेळी प्रांताधिकारी कार्यालयातील कर्मचारी उपस्थित होते.६५ व्या वर्षीही सेवेचा उत्साहवीजवितरण मंडळ कं पनीत लाईनमन काम करीत असलेले निलाखे हे पाच वर्षांपूर्वीच सेवेतून निवृत्त झाले. निवृत्तीनंतर रुग्णसेवा करण्याचा ध्यास त्यांनी घेतला. आजपर्यंत ७० हून अधिक रुग्णांची सेवा निलाखे यांनी केली आहे. वयाच्या ६५ व्या वर्षी देखील निलाखे यांच्या जवळ असलेला सेवेचा उत्साह तरुण पिढीलाही लाजवणारा आहे.