महावितरणच्या कारभाराचा उद्योजक करणार पंचनामा

दरवाढीचा निषेध : उद्योजकांचे शिष्टमंडळ मुख्यमंत्र्यांना भेटणार

कुपवाड : अकार्यक्षमता, गळती आणि भ्रष्टाचार लपवून ठेवून महावितरण देशातील सर्वाधिक महागडा वीज दर उद्योजकांवर लादत आहे. त्यांच्या चुकीचे खापर ग्राहकांवर फोडून हा वाढीव वीज दर महावितरण पुढे रेटत आहे. या वाढीव वीज दरवाढीचा जिल्ह्यातील औद्योगिक संघटनांनी निषेध नोंदवून, माध्यमाद्वारे महावितरणच्या या भोंगळ कारभाराचा पंचनामा करण्याचा निर्णय आज उद्योजकांच्या बैठकीत घेण्यात आला. लवकरच यासंदर्भात आमदार सुरेश खाडे यांच्या नेतृत्वाखाली मुख्यमंत्री व ऊर्जामंत्र्यांना भेटण्याचा निर्णयही औद्योगिक संघटनांनी यावेळी घेतला.महावितरणकडून वाढविण्यात आलेल्या वीज दरवाढीच्या निषेधार्थ आंदोलनाची दिशा ठरविण्यासाठी मिरजेतील सांगली, मिरज मॅन्युफॅक्चरर्स असोसिएशनच्या सभागृहात जिल्ह्यातील उद्योजकांची बैठक आयोजित करण्यात आली होती. या बैठकीच्या अध्यक्षस्थानी राज्य वीज ग्राहक संघटनेचे अध्यक्ष प्रतापराव होगाडे होते. आमदार खाडे, असोसिएशनचे अध्यक्ष संजय अराणके प्रमुख उपस्थित होते.यावेळी होगाडे म्हणाले की, देशात इतर राज्यांच्या तुलनेत दीडपट महाग वीज दर उद्योजकांवर लादला आहे. अकार्यक्षमता, गळती, भ्रष्टाचाराचा कळस महावितरणमध्ये झाला आहे. ही खोटी आकडेवारी टाळून महावितरणने उद्योग वाढण्यासाठी प्रयत्न करावेत.यावेळी कृष्णा व्हॅली चेंबरचे माजी उपाध्यक्ष सतीश मालू म्हणाले की, वस्त्रोद्योगाला ६५ टक्केच्या जवळपास वीज दरवाढ केली आहे. त्यामुळे वस्त्रोद्योग संपणार आहे. वसंतदादा सोसायटीचे अध्यक्ष सचिन पाटील म्हणाले की, नव्या वीज दरवाढीला स्थगिती द्यावी आणि जुन्या दरानेच वीज बिले भरून घ्यावीत.
उद्योजक दीपक शिंदे, पलूसचे उमेश पाटील, कृष्णा व्हॅलीचे उपाध्यक्ष रमेश आरवाडे आदींची भाषणे झाली़ संजय अराणके यांनी स्वागत केले़ सतीश वाघ यांनी आभार मानले़ यावेळी दीपक मर्दा, अनंत चिमड, प्रकाश शहा, पांडुरंग रूपनर, हेमंत महाबळ, विनोद पाटील, हर्षल खरे, के. एस़ भंडारे, विजय भगत, अण्णासाहेब कोरे, एस़ जी़ तायशेट्टी, गणेश निकम, विजय भोसले, अजय खांबे, बी. एस. सूर्यवंशी आदी उपस्थित होते़ (वार्ताहर)

माजी ऊर्जा सचिवावर हल्लाबोल...
खोट्या गळतीसह शेतकऱ्यांची बोगस आकडेवारी सादर करून गोलमाल करणारे माजी ऊर्जा सचिव अजय मेहता यांच्यावर आजच्या उद्योजकांच्या बैठकीत संघटनांकडून कडाडून टीका करण्यात आली. तसेच खाडे यांच्या नेतृत्वाखाली मुख्यमंत्र्यांच्या बैठकीत वीज दर वाढीवर तोडगा न निघाल्यास जिल्ह्यात उद्योग बंदसह मोर्चा आदी आंदोलने करण्याचा निर्णयही यावेळी औद्योगिक संघटनांच्यावतीने सर्वानुमते घेण्यात आला.