पाटणमध्ये ६३२ शेतकऱ्यांच्या कमरेला शस्त्र!

जळी-स्थळी वन्यप्राण्यांची भीती : शेतीच्या रक्षणासाठी ३७७ परवानाप्राप्त बंदुकी

अरुण पवार ल्ल पाटण इतर तालुक्यांच्या मानाने पाटण तालुका शांतच. शस्त्रास्त्र तस्करी, अंमली पदार्थ किंवा गँगवार तालुक्यात औषधाला ही सापडणार नाही; पण तालुक्यात अशी व्यक्तिमत्त्वे आहेत की त्यांची कीर्ती राज्यभर आहे. दुसरीकडे दुर्गम, जंगली तालुका असल्यामुळे वन्यप्राण्यांकडूनच शेतीचे नुकसान चालूच आहे. शेती संरक्षणासाठी ३७७ शेतकऱ्यांकडे परवानाधारक बंदुका तर स्वरक्षणासाठीच्या परवान्यावर २५५ जणांकडे पिस्तूल, रायफल, बंदुका अशी स्वयंचलित शस्त्रे असल्यामुळे पाटण तालुक्यात शेतीबरोबरच स्वत:च्या रक्षणाची अनेकांना काळजी असल्याचे दिसते. पाटणच्या उपविभागीय कार्यालयाकडून मिळालेल्या आकडेवारीवरून ३७७ शेतीसंरक्षणासाठी बंदूक परवाने व २५५ स्वरक्षणासाठी परवाने दिल्याचे स्पष्ट होते. काही शस्त्र परवानाधारकांनी आपले परवाने नूतनीकरण न केल्याचा शोध घेतला असता तब्बल ९७ जणांचे परवाने रद्द केल्याची कार्यवाही प्रांत कार्यालयाकडून सुरू असून, त्यांनी आपल्या जवळच्या बंदुका जमा करण्याचे आदेश बजावणार असल्याची माहिती आहे. तर दुसरीकडे आजोबा, वडील यांनी परवान्यावर खरेदी केलेल्या बंदुका त्यांच्या निधनानंतर अद्याप त्यांचेच नावावर परवाने आहेत. अशांचे परवाने रद्द करण्याच्या हालचाली सुरू आहेत. सध्या वन्यप्राण्यांच्या शिकारीचा कायदा कडक झाल्यामुळे पूर्वीसारख्या जंगलात जाऊन शिकारी करण्याचा छंद अनेकांनी सोडून दिला आहे. त्यामुळे शेती संरक्षणाच्या नावाखाली गावोगावी हंटरमॅन म्हणून प्रसिद्ध झालेल्या व्यक्तींचे नामोनिशाण इतिहासजमा झाले आहे.