लोकमत न्यूज नेटवर्क
सांगली : वर्षभरापूर्वी सावळज (ता. तासगाव) येथील बंद घर फोडून सोन्या-चांदीचे दागिने लंपास करणाऱ्यास स्थानिक गुन्हे अन्वेषण शाखेच्या पथकाने अटक केली. बबलू पपलू शिंदे (वय २२, रा. खंडकी, ता. मंगळवेढा, जि. सोलापूर) असे संशयिताचे नाव असून, त्याच्याकडून ५७ हजार ५०० रुपयांचा मुद्देमाल जप्त करण्यात आला आहे.
जिल्ह्यातील गुन्ह्यांचा तपास करून गुन्हेगारांवर कारवाई करण्याचे आदेश पोलीस अधीक्षक दीक्षित गेडाम यांनी दिले आहेत. त्यानुसार एलसीबीचे पथक सांगली शहरात गस्तीवर हाेते. यावेळी माधवनगर रोडवरील बायपास रोडलगत असलेल्या बंद पंपाजवळ संशयित थांबल्याची माहिती मिळाली होती. त्यानुसार पथकाने छापा टाकून बबलू यास ताब्यात घेतले. त्याच्याजवळ ५७ हजार ५०० रुपयांचे दागिने मिळून आले. यावेळी त्याने वर्षाभरापूर्वी सावळज येथील बंद घर फोडून दागिने चोरल्याचे पोलिसांना सांगितले. त्याच्याकडून ३० हजार ररुपये किमतीचे गंठण, २० हजार रुपये किमतीची सोन्याची टिक, साडेसात हजार रुपयांचे पैंजण असा ऐवज जप्त करण्यात आला आहे.
पोलीस निरीक्षक सर्जेराव गायकवाड यांच्या मार्गदर्शनाखाली दिलीप ढेरे, संदीप गुरव, संदीप नलावडे, जितेंद्र जाधव, ऊर्मिला खोत आदींच्या पथकाने ही कारवाई केली.