कुपवाड : मानमोडी (ता. मिरज) येथे गेल्या ४३ वर्षांपासून प्रलंबित असलेल्या स्मशानभूमी मार्गावरील रस्त्याचा प्रश्न मार्गी लागला आहे. या रस्त्याच्या डांबरीकरणासाठी जिल्हा परिषद सदस्या मनीषा पाटील यांच्या प्रयत्नातून दहा लाखांचा निधी देण्यात आला असून, नुकताच या कामाचा प्रारंभ करण्यात आला.
मानमोडीतील स्मशानभूमीच्या दिशेने जाणारा हा रस्ता गेल्या ४३ वर्षांपासून दुरवस्थेत होता. पावसाळ्यात ग्रामस्थांचे अतोनात हाल हाेत होते. अंत्यविधीस जाताना एक किलोमीटरची कसरत चिखलातून करावी लागत होती. चिखल आणि काटेरी झुडपांमुळे या मार्गावर वाहने घेऊन जाणे शक्य हाेत नव्हते. अंत्यविधीसाठी आवश्यक साहित्य, सरपण लोकांना खांद्यावरून घेऊन जावे लागत होते.
या रस्त्याच्या समस्येबाबत पदाधिकाऱ्यांनी पाठपुरावा केला होता. त्यांनी जिल्हा परिषद सदस्या मनीषा पाटील यांच्याकडे केलेल्या मागणीला यश आले. पाटील यांनी जिल्हा परिषदेच्या जनसुविधा योजनेतून दहा लाखांच्या निधीची तरतूद केली आहे. या कामाचा आरंभ बाजार समितीचे संचालक आण्णासाहेब कोरे, जिल्हा परिषदेचे माजी सभापती आप्पासाहेब हुळ्ळे, दत्तात्रय पाटील या मान्यवरांच्या हस्ते झाला.
कार्यक्रमास सरपंच सुरेश गायकवाड, उपसरपंच दयानंद म्होपरे, रमेश मुळीक, विजय सूर्यवंशी, हंबीरराव साळुंखे, संपत देसाई, आनंदा पवार, अनिल बसवण यांच्यासह सदस्य व ग्रामस्थ उपस्थित होते.
फोटो : २४ कुपवाड १
ओळ : मानमोडी (ता. मिरज) येथील स्मशानभूमी रस्ता कामाचा आरंभ जिल्हा परिषदेचे माजी सभापती आप्पासाहेब हुळ्ळे याच्याहस्ते करण्यात आला. यावेळी आण्णासाहेब कोरे, सरपंच सुरेश गायकवाड, उपसरपंच दयानंद म्होपरे, रमेश मुळीक, विजय सूर्यवंशी, हंबीरराव साळुंखे उपस्थित होते.