प्रवीणच्या अनोख्या प्रेमापुढे ओशाळला मृत्यू...

सांगलीचा प्रियकर : प्रेयसीचा मृत्यू समोर दिसत असूनही केले लग्न, अहमदाबादमधील कहाणी

सांगली : प्रेम म्हणजे प्रेम असतं... तुमचं आमचं सेम असतं, असे सर्वच प्रेमिक म्हणत असले तरी, काहींचे प्रेम खरोखरच अनेकांना मार्गदर्शक असते. प्रेयसीचा मृत्यू काही महिन्यांवर येऊन ठेपला असतानाही, तिच्याशीच लग्न करण्याचा हट्ट धरुन कोणालाही न जुमानता तो पूर्ण करण्याचे कार्य सांगलीच्या एका प्रियकराने केले आहे. नियती ही कोणालाच टळलेली नाही. परंतु नि:स्वार्थी प्रेमाचा अनोखा आविष्कार बघून मृत्यूदेखील ओशाळला असेल. सांगलीतील प्रवीण पाटील हा उच्चशिक्षित तरुण. २००८ मध्ये तो काही कामानिमित्त गुजरात राज्यातील अहमदाबाद येथे गेला होता. तेथेच त्याची वस्त्रापूर येथील रिक्रुटमेंट कंपनीत कार्यरत असणाऱ्या हितार्थी पारिख हिच्याशी नजरानजर झाली आणि तो तिच्या प्रेमात पडला. कालांतराने त्यांच्यातील भेटी वाढत गेल्या आणि ओळखीचे रूपांतर कधी प्रेमात झाले ते कळलेच नाही. प्रवीणने हितार्थीपुढे अचानक लग्नाचा प्रस्ताव ठेवला. वास्तविक हितार्थीला देखील प्रवीणशीच लग्न करायचे होते. परंतु एक महत्त्वाची अडचण होती आणि वस्तुस्थिती प्रवीणला सांगणे क्रमप्राप्तच होते. अखेर हितार्थीने आपल्याला कर्करोग असल्याचे प्रवीणला सांगितले. प्रेमात सर्व काही माफ असते, हे वाक्य ऐकायला ठीक असले तरी, लग्न करीन तर हितार्थीशीच, अशी भूमिका प्रवीणने घेतली. याला हितार्थीच्या कुटुंबियांनीच विरोध केला. परंतु प्रवीणने कोणाचेच ऐकण्यास नकार दिला. अखेर २०१० मध्ये दोघांचे लग्न झाले. दरम्यानच्या काळात हितार्थीवर वैद्यकीय अधिकारी उपचार करीतच होते. लग्नानंतर हितार्थीची जबाबदारी प्रवीणने आपल्या खांद्यावर घेतली. साहजिकच यानंतर महत्त्वाचा प्रश्न होता, तो हितार्थीला अधिकाधिक काळ जग कसे पाहता येईल यासाठी तिच्यावर उत्तमातील उत्तम वैद्यकीय उपचारात सातत्य ठेवण्याचा. अर्थात त्याला खर्चही भरपूर येणार होता. पण प्रवीण डगमगला नाही. त्याने अधिक पैसे कमावण्यासाठी वारंवार नोकऱ्या बदलल्या. २०११, २०१२, २०१४ मध्ये हितार्थीवर मोठ्या शस्त्रक्रिया करण्यात आल्या. कदाचित हितार्थी व प्रवीणचे नि:स्वार्थी प्रेम बघून मृत्यूदेखील त्यांच्या दाराबाहेर थांबला होता. प्रवीणने पाच वर्षाच्या कालावधित हितार्थीच्या उपचारासाठी १० लाख रुपये खर्च केले. तसेच आरोग्य विमा योजनेतून सुमारे १८ लाख रुपये खर्च झाले. एका शस्त्रक्रियेदरम्यान हितार्थीला रक्ताची नितांत गरज होती. त्यावेळी प्रवीणच्या कंपनीतील २१ सहकाऱ्यांनी रक्तदान केले होते. दिवसेंदिवस मृत्यू जवळ येत चालल्याची जाणीव सर्वांनाच होऊ लागली होती. परंतु अखेर मृत्यूने दारावर टिकटिक केलीच आणि १८ मे रोजी हितार्थीने रुग्णालयातच अखेरचा श्वास घेतला. (प्रतिनिधी)