रत्नागिरी : रत्नागिरी जिल्ह्यातील अनेक व्यवसाय कोरोनाच्या वाढत्या प्रादुर्भावामुळे बंद ठेवण्यात आले आहेत. माडी व्यवसायही बंद ठेवण्यात आल्याने या व्यावसायिकांचे मोठ्या प्रमाणावर नुकसान होत आहे. त्यामुळे किरकोळ माडी विक्री व्यवसायाला पार्सल स्वरुपात सुरु करण्याची परवानगी मिळावी, अशी मागणी रत्नागिरी जिल्हा माडी व्यावसायिक संघाकडून करण्यात आली आहे. या आशयाचे निवेदन गुरूवारी जिल्हा प्रशासनाला देण्यात आले.
या निवेदनात म्हटले आहे की, रत्नागिरी जिल्ह्यातील किरकोळ माडी विक्री व्यवसाय कोरोना प्रादुर्भावामुळे १५ एप्रिलपासून शासनाच्या आदेशानुसार बंद ठेवण्यात आला आहे. त्यामुळे हे व्यावसायिक आर्थिक विवंचनेत सापडले आहेत. रत्नागिरी जिल्ह्यातील माडी व्यवसाय करणारा वर्ग उदरनिर्वाहाचे साधन नसल्यामुळे बेरोजगार अवस्थेत घरीच बसून आहे. त्यामुळे शेकडो कुटुंबांवर उपासमारीची वेळ आलेली आहे.
त्यातच शासनाने सप्टेंबर २०२० ते ऑगस्ट २०२१पर्यंत १२ महिन्यांची आगाऊ बीड रक्कम नूतनीकरण पध्दतीने माडी दुकानाची फी भरुन घेतलेली आहे. एप्रिल २०२१च्या सुरुवातीपासून जिल्हाधिकारी यांच्या आदेशाने कोरोना प्रादुर्भावामुळे सुमारे ३ महिने व्यवसाय बंदस्थितीत आहे. माडी व्यवसाय सुरु करण्यासाठी व्यावसायिकांनी बँकेकडून व पतसंस्थेकडून कर्ज घेतलेले आहे. माड़ी व्यवसाय सुरु नसल्यामुळे गेले २ महिने कर्जाचे हप्ते माडी व्यावसायिक भरु शकलेले नाहीत.
या व्यावसायिकांनी केरळ, तामिळनाडू या परराज्यातून माडी उत्पादनासाठी मजूर आणलेले आहेत. माडी विक्री व्यवसाय करण्यासाठी माडी दुकानांची जागा कराराने भाड्याने घेण्यात आलेल्या आहेत. त्यासाठी आगाऊ रक्कम जागा मालकांना डिपॉझिट म्हणून देण्यात आलेली आहे. माडाची झाडे एक वर्षांची रक्कम भरुन कराराने खरेदी केलेली आहेत. त्यामुळे हे व्यावसायिक कर्जाची रक्कम कशी भागवणार, या विवंचनेत सापडलेले आहेत. तसेच स्वतःच्या कुटुंबाचा उदरनिर्वाह कसा करणार, ही चिंता आहे.
या सर्व अडचणींचा विचार करून शासनाने किरकोळ माडी विक्री व्यवसाय पार्सल स्वरुपात सुरु करण्यासाठी लवकरात लवकर परवानगी दयावी, अशी मागणी रत्नागिरी जिल्हा माडी व्यावसायिक संघाने केली आहे.