लाेकमत न्यूज नेटवर्क
टेंभ्ये : कोरोना संदर्भातील ड्युटीचा कालावधी हा जास्तीत जास्त दहा दिवसांचा असणार आहे. तसेच माध्यमिक शाळांचे दैनंदिन कामकाज सुरू झाल्यामुळे माध्यमिक शिक्षक व कर्मचाऱ्यांना कोविड ड्युटी देण्यात येऊ नये, अशी मागणी जिल्हा माध्यमिक व उच्च माध्यमिक संघटनेच्या समन्वय समितीतर्फे करण्यात आली आहे. या संदर्भातील विनंतीपत्र शिक्षणाधिकारी व समन्वय समितीतर्फे जिल्हाधिकारी यांना देण्यात येणार आहे.
रत्नागिरी जिल्हा माध्यमिक व उच्च माध्यमिक संघटना समन्वय समितीची शिक्षणाधिकारी माध्यमिक निशादेवी वाघमोडे यांच्यासोबत बैठक पार पडली. या बैठकीमध्ये माध्यमिक शिक्षण विभागामध्ये प्रलंबित असणाऱ्या विविध प्रश्नांवर चर्चा करण्यात आली. सर्व प्रलंबित प्रश्न सोडविण्यासाठी शिक्षण विभाग विशेष प्रयत्न करणार असल्याचे शिक्षणाधिकारी वाघमोडे यांनी सांगितले.
या बैठकीत सुरुवातीला समन्वय समितीचे सचिव सागर पाटील यांनी उपस्थितांचे स्वागत केले व सभेचे प्रास्ताविक केले. यावेळी उपशिक्षणाधिकारी नरेंद्र गावंड, गोपाळ चौधरी व अधीक्षक चौगुले उपस्थित होते. समन्वय समितीचे अध्यक्ष विजय पाटील, उपाध्यक्ष प्रदीप वाघोदे, सहसचिव गजानन पाटणकर यांच्यासह समन्वय समितीच्या सर्व सदस्यांनी चर्चेमध्ये सहभाग घेतला. कोविड संदर्भातील कामकाज सुरू असणाऱ्या माध्यमिक शाळांना ‘वर्क फ्रॉम होम’चे आदेश दिले असून, आवश्यक असल्यास माध्यमिक शाळेशेजारील प्राथमिक शाळेची इमारत उपलब्ध करून देण्यात येणार आहे. दिव्यांग कर्मचाऱ्यांसाठी ३ मे २०२१च्या शासन निर्णयानुसार उपस्थितीबाबत अंमलबजावणी केली जाणार आहे. शिक्षण विभागातर्फे उपशिक्षणाधिकारी गोपाळ चौधरी व समन्वय समितीतर्फे सचिव सागर पाटील यांनी उपस्थितांचे आभार मानले.
चार ते सहा आठवड्यांत प्रकरण निकाली काढा
माध्यमिक शिक्षण विभाग कार्यालयांमध्ये प्रलंबित असणाऱ्या वरिष्ठ श्रेणी, निवड श्रेणी, मुख्याध्यापक मान्यता, स्वाक्षरी अधिकार, वैद्यकीय देयके, सेवानिवृत्त प्रकरणे यासह सर्व प्रलंबित प्रकरणे लवकरात लवकर निकालात काढण्याच्या अनुषंगाने कार्यालयातील कर्मचाऱ्यांना विशेष सूचना दिल्या जाणार आहेत. तसेच प्रकरण दाखल झाल्यापासून चार ते सहा आठवड्यांत ते निकालात काढण्यात येणार आहे व प्रलंबित प्रकरणांची यादी समन्वय समितीकडे देण्यात येणार आहे.
------------------------------
निवड श्रेणीची प्रकरणे निकाली काढणार
वरिष्ठ अथवा निवड श्रेणी प्रस्तावासोबत संस्थेचा अद्ययावत पीटीआर जोडणे आवश्यक नाही. शाळास्तरावर वरिष्ठ व निवड श्रेणीसाठी पात्र शिक्षकांची यादी प्रसिद्ध करून ती यादी शिक्षण विभागाकडे जमा करण्याबाबत आदेश देण्यात येणार आहेत. नियमाप्रमाणे असणारी सर्व वरिष्ठ व निवड श्रेणीची प्रकरणे तत्काळ निकालात काढण्यात येणार आहेत.
---------------------------------
शाळांमध्ये पन्नास टक्के उपस्थिती
माध्यमिक शालांत प्रमाणपत्र परीक्षेच्या निकालासंदर्भातील कामकाज पूर्ण झालेल्या शाळांमधील कर्मचाऱ्यांसाठी पन्नास टक्के उपस्थितीचे धोरण लागू करण्यात आले आहे. जिल्हाधिकारी यांच्या आदेशाप्रमाणे वीकेंड लॉकडाऊन माध्यमिक शाळेतील सर्व कर्मचाऱ्यांसाठी लागू आहे.