वृद्धाला मारहाण केल्याप्रकरणी तिघांविरोधात गुन्हा दाखल
By लोकमत न्यूज नेटवर्क | Published: May 10, 2021 04:32 AM2021-05-10T04:32:10+5:302021-05-10T04:32:10+5:30
खेड : तालुक्यातील बोरघर घोलपवाडी येथील वृद्धाला तिघांनी पूर्ववैमनस्यातून मारहाण केल्याची घटना शनिवारी, दि. ८ रोजी सकाळी ७़ ३० ...
![A case has been registered against three persons for assaulting an old man | वृद्धाला मारहाण केल्याप्रकरणी तिघांविरोधात गुन्हा दाखल A case has been registered against three persons for assaulting an old man | वृद्धाला मारहाण केल्याप्रकरणी तिघांविरोधात गुन्हा दाखल](https://d3pc1xvrcw35tl.cloudfront.net/images/840x630/ratnagiri-marathi-default-image_202012530755.jpg)
वृद्धाला मारहाण केल्याप्रकरणी तिघांविरोधात गुन्हा दाखल
खेड : तालुक्यातील बोरघर घोलपवाडी येथील वृद्धाला तिघांनी पूर्ववैमनस्यातून मारहाण केल्याची घटना शनिवारी, दि. ८ रोजी सकाळी ७़ ३० वाजण्याच्या सुमाराला घडली़ या मारहाणीत गंभीर जखमी झालेल्या वृद्धावर कळंबणी उपजिल्हा रुग्णालयात उपचार सुरू आहेत. या प्रकरणी तिघांविरोधात गुन्हा दाखल करण्यात आला आहे़
लक्ष्मण विठोबा घोलप (वय ६६, रा. घोलपवाडी, मु. बोरघर) हे त्यांच्या पत्नी सुनीता घोलप, मुलगा नवनाथ घोलप, सून नेहा नवनाथ घोलप व दोन नातवंडं असे एकत्र राहतात. दि. ८ रोजी सकाळी ७़ ३० वा. सुमारास घरासमोरील कुलदैवत मंदिराच्यासमोर घरगुती सत्यनारायणाची पूजा असल्याने लक्ष्मण घोलप मकर तयार करत होते. त्यांचा नातू गौरव अनिल शिंदे (१३) हा लोखंडी कोयतीने नारळ फोडत होता. त्यांची पत्नी व सून यांनी मंदिरासमोरील जागा शेणाने सारवली होती. त्या मंदिराच्या शेजारी लक्ष्मण घोलप यांचे दोन सख्ख्ये भाऊ प्रकाश विठोबा घोलप (वय ६०) व दीपक विठोबा घोलप (५५, दोघे रा. घोलपवाडी, मु. बोरघर) हाेते़ दीपक घोलप यांच्या कोंबड्या पूजेच्या ठिकाणी सारवलेली जागा उकरत असल्याचे पाहून लक्ष्मण घोलप यांनी समजावून सांगितले़ या गोष्टीचा मनात राग धरून दीपक याने लक्ष्मण यांना शिवीगाळ करण्यास सुरुवात केली. त्याचवेळी लहान भावजय दीपिका दीपक घोलप व भाऊ प्रकाश घोलप हे तेथे आले़ त्या तिघांनी लक्ष्मण घोलप यांना शिवीगाळ केली, तर दीपक याने लक्ष्मण यांना मारहाण केली़ दीपिका हिने त्यांचे दोन्ही हात पकडले व दीपक याने त्यांच्या डाव्या डोळ्यावर ठोशा मारला़ भाऊ प्रकाश याने लोखंडी कोयता डोक्यावर मारला. त्यात लक्ष्मण घोलप गंभीर जखमी झाले. त्यांना कळंबणी उपजिल्हा रुग्णालयात दाखल करण्यात आले आहे़ या घटनेची माहिती लक्ष्मण घोलप यांनी पोलिसांना दिल्यानंतर पोलिसांनी दीपक विठोबा घोलप (५५), दीपिका दीपक घोलप व प्रकाश विठोबा घोलप (६०) यांच्या विरोधात गुन्हा दाखल केला आहे़