Stock Market Today: गेल्या काही दिवसांपासून शेअर बाजारात चढउतार दिसून येत होते. परंतु आज शेअर बाजाराच्या कामकाजाची सुरुवात तेजीसह झाली. सोमवारी बीएसई सेन्सेक्स ३४.७७ अंकांच्या तेजीसह ७७,२५७.२७ अंकांवर खुला झाला. तर एनएसई निफ्टी ६६ अंकांच्या तेजीसह २४,०६३ वर व्यवहार करत होता. देशात निरनिराळ्या राज्यांमध्ये झालेल्या निवडणुकांच्या सुरुवातीचे कल आणि जागतिक बाजारातील संकेतांचा परिणाम शेअर बाजारावर दिसून आला. विशेष म्हणजे पश्चिम बंगालमधील सुरुवातीच्या कलांमध्ये भाजपला मिळणारी आघाडीदेखील सकारात्मक परिणाम करत असल्याचं म्हटलं जातंय.
मारुती सुझुकीच्या शेअरची बंपर सुरुवात
सोमवारी सेन्सेक्सच्या ३० पैकी २८ कंपन्यांचे शेअर्स ग्रीन झोनमध्ये खुले झाले. तर २ कंपन्यांच्या शेअर्समध्ये घसरण दिसून आली. तर निफ्टीच्या ५० पैकी ४४ कंपन्यांचे शेअर्स तेजीसह खुले झाले आणि अन्य ६ कंपन्यांचे शेअर्स घसरणीसह व्यवहार करत होते. सेन्सेक्समध्ये असलेल्या मारुती सुझुकीच्या शेअरमध्ये आज सर्वाधिक ४.३० टक्क्यांची तेजी दिसून आली. तर दुसरीकडे कोटक महिंद्रा बँकेच्या शेअर्समध्ये सर्वाधिक ३.८८ टक्क्यांची घसरण झाली. याशिवाय भारती एअरटेलच्या शेअरनंही घसरणीसह कामकाजाला सुरुवात केली.
कोणत्या शेअर्समध्ये तेजी?
कामकाजादरम्यान अदानी पोर्ट्स, हिंदुस्तान युनिलिव्हर, इंडिगो, एशियन पेंट्स, अल्ट्राटेक सिमेंट, एल अँड टी, सन फार्मा, एचडीएफसी, टाटा स्टील, टेक महिंद्रा, एचसीएल टेक या कंपन्यांच्या शेअर्समध्ये सर्वाधिक तेजी दिसून आली. तर रिलायन्स इंडस्ट्रिज, अॅक्सिस बँक, इन्फोसिस, बजाज फायनान्स. एनटीपीसी, टायटन, एसबीआय या कंपन्याच्या शेअर्सनंदेखील तेजीसह कामकाजाला सुरुवात केली.