...अन् भारतातला विवाह झाला अमेरिकेत, कुटुंबाची ऑनलाईन उपस्थिती
By ऑनलाइन लोकमत | Published: May 18, 2021 08:09 PM2021-05-18T20:09:31+5:302021-05-18T20:20:48+5:30
Neral : परदेशात असलेल्या वधू आणि वर या दोघांचे भारतात लग्न ठरले होते. मात्र कोरोनाने त्यांची वाट अडविल्याने त्यांनी अमेरिकेतच लग्न केले आहे. तर या लग्नाला घरातील मंडळी हि ऑनलाईन उपस्थित होती.
...अन् भारतातला विवाह झाला अमेरिकेत, कुटुंबाची ऑनलाईन उपस्थिती
Next - कांता हाबळे
नेरळ : कोरोनाने असे नी तसे सर्व बाजूनी सर्वसामान्याना जेरीस आणले आहे. अनेक लग्न खोळंबली आहेत. तर काहींनी बँड, बाजा, बारात नको म्हणत मोजक्याच घरच्या पाहुण्यांच्या उपस्थितीत उरकून घेतली आहे. अशात कर्जत तालुक्यातील एका नवरदेवाची विवाह स्टोरी समोर आली आहे. परदेशात असलेल्या वधू आणि वर या दोघांचे भारतात लग्न ठरले होते. मात्र कोरोनाने त्यांची वाट अडविल्याने त्यांनी अमेरिकेतच लग्न केले आहे. तर या लग्नाला घरातील मंडळी हि ऑनलाईन उपस्थित होती.
कर्जत तालुक्यातील वंजारवाडी येथील रहिवासी असलेले व मुंबई येथे पोलिस निरीक्षक पदावर रुजु असलेले अनिल शंकर थोरवे ह्यांचा मुलगा अजय अनिल थोरवे आणि त्याची भारतातील केरळ येथील वर्ग मैत्रीण श्रीनिधी श्रीनिवास राघवन यांचे लग्न ठरले होते. अजय व श्रीनिधी या दोघांनी मुंबई युनिव्हर्सिटी मधून कम्प्युटर इंजिनीअरिंग केलेले असून अमेरिकेमध्ये उच्च शिक्षण घेतलेले आहे.
अजय एनव्हिडिया व श्रीनिधी मायक्रोसॉफ्ट या प्रसिद्ध कंपन्यांमध्ये उच्च पदावर कार्यरत आहेत. अजय आणि श्रीनिधी यांचं लग्न सुमारे दीड वर्षांपासून प्रलंबित होतं. कोरोनाची पहिली लाट आल्यानंतर २ एप्रिल २०२० रोजी मुंबईमध्ये लग्न करण्याचे ठरले होते. त्यासाठी हॉटेल देखील बुक केले होते. मात्र कोरोनामुळे अमेरिकेहून विमानांची वाहतूक बंद झाल्याने त्यांचे लग्न १७ मे रोजी मुंबईत करण्याचे ठरले होते. परंतु यावेळी देखील कोरोनाच्या दुसऱ्या लाटेने विवाह सोहळ्याच्या दुस-या नियोजनावर पाणी फिरवले.
कोरोनाने वाट अडविल्याने दोघांना भारतात यायला जमले नाही. म्हणुन दोघांच्या कुटुंबियांनी त्यांचे लग्न अमेरिकेत करण्याचा निर्णय घेतला व भारतातून ऑनलाइन हजेरी लावण्याचे निश्चित केले. त्यानुसार सिॲटल अमेरिका येथे अमेरिकेतील तारखेनुसार दिनांक १६ मे २०२१ रोजी सायंकाळी सहा वाजता दोघांच्या सुमारे वीस मित्र-मैत्रिणींच्या उपस्थितीमध्ये कोर्ट मॅरेज विवाह सोहळा पार पडला.
दोघांच्याही कुटुंबियांना आनंद झाला असला तरीही त्यांच्या लग्नात प्रत्यक्ष उपस्थित राहू न शकल्याची खंत दोघांच्या कुटुंबीयांनी व्यक्त केली. अशाप्रकारे कोरोनाने भारतीय जोडीचे एक लग्न अमेरिकेत करण्यास भाग पाडले. सध्या दोघेही सिॲटल अमेरिका येथे राहत आहेत.